DILI, STLTIMORLESTE.com — Deputadu husi Bankada FRETILIN, Antoninho Doutel Sarmento kestiona polítika no jestaun orsamentu IX Governu Konstitusional nian, relasiona ho desizaun harahun fali uma terminal portu Dili neebe foin reabilita ho kustu maizumenus US$ 500.000.00.
Reprezentante povu nee konsidera katak, hahalok destrui fali uma terminal portu ne’ebé foin renova ho orsamentu boot nee hatudu falta planeamentu, polítika no programa neebe moos iha governasaun nian laran.
“Ukun sem politika, planu no programa ida diak, ninia konsekuensia mak gasta osan estadu arbiru deit, hodi fo fatin diak liu ba korupsaun, triste boot tebes,” dehan Deputadu Antoninho Doutel Sarmento ba STL liu husi WhatsApp, Manufahi, Kinta (23/07/2026).
Tuir Deputadu nee, ezekusaun orsamentu neebe la lao tuir planeamentu estratejiku, kria impaktu diretu ba jestaun finansas publikas no kofre estadu nian.
Nia foti pontu xave tolu kona-ba impaktu husi desizaun nee mak hanesan soe osan estadu nian ba servisu neebe la lori benefísiu naroman no naruk ba tempu oin, kria fatin ba pratika mal-jestaun no fo biban ba korupsaun iha implementasaun projetu sira, no hatudu katak foti desizaun sira la lao tuir prioritizasaun no matadalan neebe iha, governu nee hanesan “kalan toba mehi saida aban halo ida nee, depois aban kalan toba iha fali mehi foun, dadersan hader ba sobu fila fali,” hatete reportajen povu husi Bankada FRETILIN nee.
Iha biban nee, Deputadu Bankada FRETILIN nee rekomenda ba governu atu re-avalia prioridade sira iha jestaun orsamentu estadu nian, hodi garante katak gasta osan publiku fokus duni ba nesesidade no benefísiu povu nian.
Iha fatin ketak, Akademista husi Universidade Paz (UNPAZ), Alarico da Silva kestiona desizaun sira ne’ebé foti iha jestaun projetu publiku nian.
“Hau hanoin governu ida nee lao laiha planeamentu neebe matenek no estudu viabilidade neebe klean. Se foin gasta osan boot atu reabilita no ikus mai harahun fali, nee hatudu momoos frakeza iha jestaun orsamenu no soe osan estadu nian ba servisu neebe la lori impaktu sustentável ba dezenvolvimentu nasionál,” deklara Alarico da Silva.
Nia hatutan katak, hahalok sira hanesan nee fo imajen aat ba jestaun finansas publikas no bele hamenus konfiansa publiku nian ba kapasidade ukun-na’in sira nian iha jestaun dezenvolvimentu rai-laran. Tan nee, nia husu ba orgaun fiskalizasaun sira atu foti pasu prudente, no asaun legal hodi dudu governu atu transparente no responsabiliza kada centavu orsamenu neebe uza.
Entretantu antes Ministru Transporte no Komunikasaun, (MTK), Miguel Marques Gonçalve Manetelu hatete katak, Estadu Timor-Leste lakon osan publiku hamutuk US$ 315.575,51 neebe antes uza ba reabilitasaun edifísiu Terminal Pasajeiru Portu Díli, maibe edifísiu refere ikus mai tenke sobu tanba tama iha area Projetu International Container Center (ICC).
“Imi (jornalista) husu tanba saida mak sobu edifísiu Terminal Pasajeiru Portu Díli, tanba ita hatene katak atu harii ICC, resposta mak nee. Loos duni, maske Estadu lakon ona US$ 315.575,51, tanba iha inisiu ami hanoin no haree katak projetu ICC la tama too area Edifísiu Terminal Pasajeiru. Tanba nee mak Governu halo reabilitasaun ba edifísiu refere,” dehan Ministru Miguel Marques Manetelu.
Governante nee hatutan, depois planu dezenvolvimentu portu muda, desizaun foun determina atu uza area portu tomak bá projetu ICC, neebe obriga Governu atu sobu edifísiu nee.
(car)
