DILI, STLTIMORLESTE.com – Kada tinan, kada periodu sempre akontese membru Parlamentu Nasional (PN) sira baku malu, nee hatudu jeitu neebe la edukativu iha plenaria no laiha plenaria laran.
Husi asaun sira nee hatudu momos katak sira moe laiha, tanba povu hili sira, selu sira ho salariu boot tebes, no hetan subsidiu oin-oin, laos atu ba baku malu, sobu kadeira no seluk seluk tan, maibe atu ba debate, halo lei no desidi desizaun politika ba povu nia interese.
Ho aktu sira nee halo Provedor Direitu Umanu no Justisa (PDHJ), Virgilio da Silva Guterres senti triste haree hahalok sira nee, tanba hatudu imajen neebe la diak ba povu liu-liu joven sira.
“Hau bele hatete mak nia impaktu edukasaun politika nee la diak ba povu, se iha diferensa ruma tur hamutuk debate, tuku meza naran labele tuku malu, tilun tahan bele mean ba malu oin bele mean ba malu, maibe debate tanba razaun lojika, labele ataka pesoal iha publiku, hau hanoin la eduka ita nia sidadaun no eduka ita nia joven sira,” dehan PDHJ, Virgilio ba jornalista sira iha Timor Plaza, Tersa (10/12/2024).
Tanba tuir nia Parlamentu Nasional fatin atu halo diskusaun laos atu ba baku malu ”Triste haree Deputadu sira koalia iha publiku ho lia fuan sira nee, maibe se diskusaun sira nee argumentu politiku nee diak, maibe buat neebe ita rona laos ida nee, no Provedor la iha kompetensia atu tama too iha neeba, tanba problema internal Parlamentu Nasional nian,” dehan nia.
(ter)
