DILI, STLTIMORLESTE.com – Tribunal Judisial Primeira Instansia Dili liu husi depaisu ikus ba prosesu primeiru interogatoriu, deside aplika medida Prizaun Preventiva ba iha arguida no arguidu ho inisial NSH no IFPS.
Prosesu primeiru interrogatóriu nee halao iha loron Sabadu nee (07/06/2025), neebe prezide husi Juiz Turnu Ana Paula, Ministeriu Publiku reprezenta husi Prokuradora Lidea Soares, arguida no arguidu hetan asistensia legal husi Defensor Publiku, Eustaquio Guterres no Fransisco Martins.
Halo tiha identifikasaun ba arguida no arguidu, ikus mai Juiz turnu deside hodi aplika medida prizaun preventiva.
Tuir defeza arguidu sira nian, Eustaquio Guterres katak, nia parte konsidera arguida no arguidu la prienxe rekezitus komete krimi neebe Ministeriu Publiku akuza kona-ba Trafiku Humanu.
“Tribunal haree katak iha indisus forte ba arguidu no arguida nee komete krimi Trafiku Humanu, ida nee Tribunal nia haree, nuudar defeza haree katak krimi neebe deskonfia Ministeriu Publiku akuza ba arguidu no arguida nee krimi la iha,” dehan Eustaquio ba jornalista sira iha Kaikoli.
Nia hatutan, defeza konsidera krimi la iha, tanba ema hirak neebe hakarak ba servisu iha rai liur voluntariamente mak husu ajuda ba arguida no arguidu hodi fasilita no fo informasaun ho nunee sira hakarak ba servisu iha rai liur, maibe kona-ba krimi Trafiku Humanu nee presiza Kriteria lubuk ida mak foin prienxe krimi Trafiku Humanu nee.
Sublina tan, ohin loron ema Timor barak mak hakarak ba servisu iha rai liur, arguida no arguidu mos iha kompanhia neebe rejista no legal sira bele akompanha no haruka ema ba servisu iha rai liur.
Defeza dehan, iha alegasaun Prokuradora husu atu aplika medida Prizaun Preventiva, maibe husi parte defeza husu atu aplika medida Aprezentasaun Periodika ka Termo Identidade Rezidensia hodi hein prosesu investigasaun.
Maibe ikus mai Tribunal aplika medida Prizaun Preventiva, tanba nee defeza la konkorda no sei halo rekursu tuir prazu neebe iha.
“Hau la konkorda no sei halo rekursu,” dehan nia.
(ter)
