DILI, STLTIMORLESTE.com – Dezentendimentu ka konfrontu neebe mosu foin lalais nee entre Diresaun Servisu Investigasaun Kriminal Nasional (DSIK) no Polisia Sientifiku no Investigasaun Kriminal (PSIK) iha area Kampung Baru horikalan, wainhira operasaun atu kaer sidadaun estranjeiru sira neebe envolve iha rede scamming (fraude liu hosi teknolojia), hatudu perigu ba seguransa nasional, tanba frakeza iha koordinasaun instituisional no bele implika interese politiku laran.
Komentariu nee hatoo hodi responde ba insidente neebe akontese iha Kampung Baru, Dili, iha neebe operasaun konjunta ka asaun husi forsas rua nee nian hetan kazu no dezentendimentu publikamente kona-ba kompetensia no forma oinsa atu kaer suspeitu estranjeiru sira neebe halo operasaun ilegal.
Tuir Observador Politiku, Santiago da Silva, katak kazu scamming internasionais neebe agora dadaun nee buras hela iha rai-laran laos deit kazu krime ordinariu, maibe nuudar ameasa ba seguransa nasional no soberania Estadu nian. Tan nee, konfrontu ka mal-entendidu entre autoridade seguransa rasik iha terrenu laran halakon konfiansa publiku no fo espasu ba krime sira, atu halai husi responsabilidade.
“Kooperasaun no koordinasaun mak xave prinsipal. Kuandu instituisaun Estadu nian hanesan DSIK no PSIK desentende malu iha terrenu, liuliu iha operasaun boot hasoru krime transnasionais hanesan scamming, nee hatudu katak iha falta grave ba lideransa operasional no kbiit atu halo servisu hamutuk,” dehan Santiago ba STL, Tersa nee (28/08/2026).
Nia husu ba Komando Jeral PNTL no Governu liu husi osi Ministeriu Interior atu loke investigasaun hodi klarifika insidente nee, hodi nunee labele fo impaktu neebe negativu ba imajen instituisaun seguransa nian iha oin sidadaun sira no komunidade internasional.
Situasaun neebe akontese iha Kampung Baru nee rasik lori fali atensaun publiku nian ba oinsa rede scamming neebe uza sidadaun estranjeiru kontinua buras iha kapital, maski autoridade sira sempre halo ona asaun kapturasaun iha tempu ba tempu.
Iha parte ketak, akademista husi UNTL), Eduardo Magno, hatete insidente nee refleta lo-loos problema klean liu iha sistema seguransa interna, no presiza halo reforma estrutural lalais hodi evita konfuzaun hanesan iha futuru.
“Iha ita nia haree, kazu ida nee presiza duni atensaun seriu husi parte superior, tanba se la’e sei hamosu impaktu neebe la diak ba estabilidade no seguransa iha rai-laran,” hatete Eduardo.
Entretantu, imajen no vidiu hosi dezentendimentu nee espalha lalais iha rede sosial oi-oin hanesan Facebook, TikTok no plataforma dijital seluk tan. Kondisaun nee hamosu kedas debate boot no hetan atensaun makaas hamutuk ho komentariu oi-oin husi publiku, neebe barak liu preokupa ho reputasaun instituisaun seguransa estadu nian.
(car)
