DILI, STLTIMORLESTE.com – Dili Institute of Technology (DIT) ensera orientasaun akademiku no tomade pose ba estrutura DITSA eleitu ba tinan 2025 iha knua DIT.
“Ohin ita halibur hamutuk iha fatin nee hodi halao atividade ba toma de pose ba Prezidente DITSA nomos enseramentu ba ita nia orientasaun akademiku ba tinan 2025, iha oportunidade nee nakonu ho kontente, nunee hau hanesan Reitor DIT ho haraik aan hatoo benvindu ba estudante foun sira,” hatete Reitor DIT, Salustiano dos Reis Piedade liu husi iha ambitu ensera orientasaun akademiku nomos tomade de pose ba estrutura DITSA iha knua DIT, Sesta (28/02/2025).
Nunee mos ba estrutura DITSA ba tinan 2025 nian, loron ohin asiste momentu importante iha vida kampus DIT nian, DIT ba periodu tinan 2025 formalmente hetan ona tomade pose hodi halao knaar reprezenta lian no aspirasaun estudante nian durante eskola iha DIT.
Tanba nee komesa ohin ba ohin estrutura DITSA foun sira mak sai superior baze ba estudante sira hotu, nunee estudante hakarak hatoo buat ruma liu husi sira, tanba nee la autoriza estudante idak-idak ba reklama buat ruma iha reitor ka ba institutu, tanba iha asosiasaun hatoo ba sira hafoin aprezenta ba reitor.
“Hau fiar ho lideransa foun nee ita sei hakat diak liu tan hodi dezenvolve vida akademika kampus DIT nian ho dinamiku no kooperativu.
Kampus DIT nuudar fatin neebe imi bele dezenvolve imi nia aan sai papel sentral hodi forma imi nia karakter abilidade no aumenta valor estudante sira nian, mosu akademiku atividade ekstra kurikuler imi sei iha oportunidade uniku hodi moris no kreze iha institutu.
Ba estudante foun tinan akademiku 2025 hakarak hatoo, kuandu atividade relasiona orientasaun DIT nian, DIT deside halao orientasaun kampus ho formatu neebe diak no simu enjeral, fahe informasaun kona-ba akademiku, administrasaun, finansas, biblioteka nomos konvida orador husi liur fahe esperiensia ba estudante foun.
Tanba nee titulu ba orientasaun nee tipu konvensional, tanba dala barak orientasaun ho tipu tradisional dala barak hakilar no seluk tan, maibe DIT la autoriza tipu orientasaun tradisional nee bele fo efeitu negativu.
Orientasaun nee durante loron 5, hahu husi loron Segunda too Sesta.
Iha fatin hanesan, Estudante Foun, Emilia dos Santos hatete, durante orientasaun iha loron 5 nia laran sente lao diak, tanba sira bele fo konhesimentu kona-ba ambiente DIT nian, tanba nee atu hahu prosesu aprendizajen bele hatene saida mak administrasaun, biblioteka, finansa no seluk tan.
“Hau hakarak hili DIT, tanba ensinu superior neebe kualidade ho fasilidade neebe diak,” dehan nian.
(joa)
