BAUCAU, STLTIMORLESTE.com – Dirasaun Munisípal Transporte Komunikasaun (DMTK) Baucau rekoilha reseitas hamutuk US$ 243,138.00 ba kofre Estadu husi kliente 12,456.
Informasaun nee hatoo husi Diretor DMTK Baucau, Mariano Pinto da Costa, hatete ba STL iha nia knaar fatin iha Uatulete, Vila Nova Baucau, Tersa (25/08/2026),
Nia esplika, reseitas refere rekoilha husi prosesu atendimentu kliente sira kona-ba trata karta kondusaun, rejistu foun, infrasaun, trajetu públiku no inspesaun.
“Reseitas ne’ebé to’o Julhu ami hatama ba kofre Estadu hamutuk US$243,138.00. Fulan Junhu no Julhu mak reseitas maka’as liu,” Mariano informa.
Tuir nia dadus, iha fulan Janeiru DMTK Baucau rekoilha US$ 28,453.00 ho invoise 1,850, Fevereiru US$ 25,459.00 ho invoise 1,577, Marsu US$ 30,369.00 ho invoise 1,811, Abril US$ 24,595.00 ho invoise 1,435, Maiu US$ 24,198.00 ho invoise 1,383, Junhu US$ 68,875.00 ho invoise 2,464, no Julhu US$ 95,963.00 ho invoise 17,071.
Mariano esplika, aumentu reseitas ne’e maka’as liu iha Junhu no Julhu tanba Governu hahú implementa regras foun ba transporte públiku no privadu, ne’ebé inklui taxa ba karta kondusaun, rejistu, infrasaun, trajetu públiku no inspesaun.
“Antes ne’e reseitas sae liu iha US$28,000, maibé depois implementa Lei foun númeru 17/2026, reseitas sae maka’as. Iha fulan Agostu ami seidauk sura, maibé reseitas mos sae maka’as,” nia hatete.
Diretor DMTK Baucau rekonhese katak implementasaun regras foun iha dezafiu, tanba reklamasaun husi kliente balu ne’ebé konsidera regras sira todan no seidauk hetan sosializasaun adekuadu.
Maski nune’e, situasaun agora diak liután, tanba kliente sira komesa koopera ho DMTK iha prosesu atendimentu no renovasaun dokumentus transporte nian.
“Regras nee implementa tiha, ema komesa tau matan ba dokumentus sira ne’ebé invalidu ona. Tanba se la renova tuir tempu, bele hetan multa. Agora ema barak preokupa atu garante dokumentus transporte sira válidu,” Mariano komenta.
Enkuantu kliente DMTK Baucau, Ojorio Da Silva Freitas, la kontente ho implementasaun regras foun tanba sosializasaun lei foun refere ba kliente sira laiha, maibé implementa ona, maibé nu’udar sidadaun no na’in ba transporte tenke koopera ho autoridade.
“Ami la satisfas ho regras nee, maibé ita koopera deit ona, tanba dokumentus kareta ka motor ne’ebé mate la renova kona tilang bele lori multa,” Ojorio hatete.
Ojorio mos husu ba DMTK Baucau atu hadi’a atendimentu, tanba apesar taxa sira aumenta, prosesu atendimentu sei la’o kleur.
Nia mos husu DMTK Baucau atu koordena ho Banku Nasionál Komérsiu Timor-Leste (BNCTL) Sukursál Baucau, atu konsidera disponibiliza funsionáriu banku nian iha edifísiu DMTK, nune’e kliente sira bele selu taxa diretamente iha fatin no la presiza la’o dook ba banku.
(tom)
