BAUKAU, STLTIMORLESTE.com – Diresaun Munisipal Transporte Komunikasaun (DMTK) Baukau menus fasilidade servisu hanesan komputador inklui meza kadeira.
“Daudaun nee ami iha problema meza kadeira sei menus, funsionariu sira mai tuur troka malu no komputador mos seidauk sufisiente ba funsionariu sira hotu, sira halo sevisu tenke tur troka malu,” hateten Diretor DMTK Baukau, Mariano Pinto da Costa STL iha Uatulete, Segunda (12/05/2025).
Diretor nee sublina, fasilidade hanesan meza kadeira antes nee sufisiente, maibe utiliza ona tinan naruk, tanba nee kuaze aat ona, mezmu daudaun iha maibe la sufisiente ba numeru funsionariu sira, nunee obrigatoriu tuur troka malu hodi halo servisu.
Aleinde mos komputador antes nee iha unidade sia hodi fasilita funsionariu sira atende ba kliente sira ho lalais, maibe razaun utiliza tinan naruk ona, nunee unidade tolu avaria no hela unidade neen, neebe fo impaktu tebes ba kliente sira.
“Nee fo impaktu, tanba ami nia atendimentu direita ba komunidade sira, entaun presiza fasilidade neebe mak diak no sufisiente para atendimentu lais no efetivu,” katak Mariano Pinto da Costa.
Diretor nee akresenta, DMTK Baukau iha funsionariu hamutuk nain 15, nunee prezisa apoiu komputador unidade 15 inklui meza kadeira hodi fasilita funsionariu sira atendimentu efetivu liu tan ba kliente sira, tanba DMTK Baukau rasik produs reseitas ba kofre estudu, maibe enfrenta problema menus fasilidade servisu inklui edifisiu kondisaun aat.
“Ami halo ona pedidu ba nasional, daudaun iha ona prosesu aprovizionamentu tempu badak sei mai halo manutensuan ba edifisiu,” katak Mariano Pinto da Costa.
Nia deklara, pedidu neebe DMTK Baukau relata ba Ministeiru relevante kompostu pedidu apoiu fasilidade servisu inklui reabilitasaun edifisiu, maibe aprova ona pedidu reabilitasaun edifisiu no seluk sei responde fazeadamente.
(tom)
