LAUTÉM, STLTIMORLESTE.com – Diresaun Nasional Rejistu Notariadu (DNRN) iha Munisipiu Lautém fo atendimentu diak ba publiku, tanba garantidu kaderneta pasaporte no Bilhete Identidade (BI) sufisiente.
“Ita nia servisu DNRN iha Munisipiu Lautem, liu-liu iha sentru Postu Administrativu Lospalos, durante nee lao ho diak, no ita fo atendimentu ba komunidade neebe mai trata dokumentu, hanesan sertidaun RDTL, Pasaporte, BI, viza familia lao ho sufisiente tebes,” dehan Diretor DNRN, Amandio Alves Gomes ba STL iha nia knaar fatin Lospalos, Segunda (06/01/2025).
Tuir Diretor nee, prosesu atu trata dokumentu sira bazeia ba kriteria neebe DNRN taka sai ba publiku, no komunidade iha Munisipiu Lautém tenke kumpri ida nee, hafoin mai trata dokumentu sira.
Tanba nee dokumentu hanesan kaderneta pasaporte ho BI, tau prioridade liu ba Veteranu sira, Ministru, Sekretariu Estadu, autoridade relevante sira seluk neebe ho urjente atu ajuda, ema estudante, ema vulneravel no ema ho difisiensia sira, nunee sira bele trata diak ho sira nia dokumentu, bainhira presiza ba halo tratamentu saude ka ba eskola ruma iha rai liur.
Nia dehan, komunidade balun neebe ho kondisaun idozus liu, vulneravel liu, husi parte DNRN mai ho planu ida, hodi ba hakbesik komunidade iha area remotas sira, liu-liu iha parte Luro no Iliómar nian, nunee bele trata sira nia dokumentu, nunee sira mos bele asesu sistema eletronika ka dijitalizasaun sira.
Iha parte seluk, hanesan Komunidade neebe trata dokumentu iha DNRN, iha Postu Administrativu Lospalos, Veronika de Andrade Vinhas katak, servisu notariadu iha Munisipiu Lautém lao ho diak, mezmu ema barak preokupa ba kaderneta pasaporte laiha, BI mos blanku laiha, maibe nafatin buka meiu hodi trata ba komunidade neebe presiza no urjente.
“Ohin ami mai trata dokumentu, liu-liu kaderneta pasaporte ho BI, no ami hanoin la atende, maibe realidade atende, no garantidu tanba fasilidade sira nee sufisiente atu simu ema neebe presiza atu halo no trata nia dokumentu sira,” nia realsa.
Tanba ema barak mak presiza trata nia dokumentu, nunee komunidade, estudante barak mak tarata nia dokumentu, no husi parte DNRN sempre fo atendimentu neebe diak ba ema hotu.
Iha parte seluk, Estudante Universidade Dili (UNDIL), Arlindo da Gama dehan, agradese tebes ba DNRN Munisipiu Lautém, tanba bele fo atendimentu diak ba estudante sira neebe trata nia dokumentu sira ho dignu.
(EST 1)
