BAUKAU, STLTIMORLESTE.com – Diresaun Risku Dezastre Naturais (DRDN) hametin estrutura Konselhu Munisipal Protesaun Sivil (KMPS), iha Postu Administrativu Vemasi, Munisipiu Baukau.
Diretor DRND Clementino Pedro Barboza esplika, hametin estrutura KMPS iha Postu Vemasi, bazeia ba diploma ministerial 85/2023 20 Dezembru kona-ba estatutu Administrasaun Munisipal no interministerial dezentralizasaun iha artigu 50 esplika servisu misaun Dezastre Naturais nian, nomos artigu 51 esplika kona-ba tarefa servisu Munisipal Protesaun Sivil nian neebe tuir lei Protesaun Sivil Nu.12/2020 02 Dezembru, iha artigu 36 natureza servisu nian no artigu 37 komposizaun funsionamentu Jestaun Dezastre Naturais nian, neebe tuir artigu 38 kompentensia Konselhu Munisipal Protesaun Sivil no Jestaun Dezastre Naturais hodi hametin estrutura Konselhu Munisipal Protesaun Sivil iha kada Postu Administrativu iha Munisipiu Baukau.
“Atividade iha Postu Vemasi nee, primeiru objetivu atu dezenvolve membru estrutura Konselhu Munisipal Protesaun Sivil Vemasi, nunee sira bele halo preparasaun, mitigasaun no resposta emerjensia ba tipu dezastre oin oin neebe karik akontese,” hateten Clementino Pedro Barboza ba STL iha Vila Nova, Baukau, Segunda (28/04/2025).
Nia sublina, baze legal ba Diresaun Risku Dezastre Naturais Munisipiu Baukau mak halo koopera ho parseiru servisu World Vision Timor Leste sei kobre Postu Administrativu sira iha Munisipiu Baukau, hodi melhora liu tan kapasidade estrutura Konselhu Munisipal Protesaun Sivil iha kada Postu, hodi halo preparasaun no mitigasaun antes bainhira dezastre naturais akontese.
Nia fundamenta, estabelesementu estrutura Konselhu Munisipal Protesaun Sivil iha kada Postu Administrativu, garante sei halo servisu apoiu Autoridade Protesaun Sivil hodi atende kazu dezastre naturais sira.
Tanba antes nee, ekipa Autoridade Protesaun Sivil ho parseiru servisu balun, kbiit la auguenta hodi hatan situasuan emerjensia sira, bainhira akontese dezastre naturais ho volume boot.
“Atividade nee laos hanorin sira, maibe nee hanesan knaar ida fanu sira funsionamentu estrutura Konselhu Munisipal bele responde ba situasaun emerjensia sira,” Clementino Pedro Barboza akresenta.
Administradora Postu Administrativu Vemasi, Elda Maria Viegas de Sousa Freitas hateten, estabelese estrutura Konselhu Munisipal Protesaun Sivil iha Postu Administrativu Vemasi importante, tanba bele haforsa servisu hodi prevene dezastre naturais neebe komunidade sira infrenta iha Postu Vemasi.
“Liu husi estrutura nee mak bele prevene atu hamenus dezastre naturais sira neebe akontese antes ou depois, nunee estrutura nee iha atu haforsa malu servisu nian atu nunee bele ajuda komunidade sira,” hateten Elda Maria.
Administradora Postu Vemasi nee argumenta, durante akontese dezastre naturais iha Vemasi, Postu laiha ekipa atu apoiu servisu ho Autoridade Protesaun Sivil no seluk tan, maibe liu husi baze legal estabelese ona, garante sei fo apoiu masimu ho Autoridade Protesaun Sivil bainhira akontese dezastre naturais iha Vemasi, tanba iha ona rekursu.
Entertantu estrutura Konselhu Munisipal Protesaun Sivil iha Postu Administrativu Vemasi hamutuk ema nain 17.
(tom)
