AMBENO, STLTIMORLESTE.com – Diretor Rejional Edukasaun, Juventude, Desportu, Arte no Kultura (DREJDAK) Sekretariu Rejional Edukasaun Asuntu Sosial (SREAS) Rejiaun Administrativu Espesial Oekusi-Ambeno (RAEOA) agradese ba inisiativa komunidade Bairu Nun Ana, Aldeia Bausiu, Suku Nipane, Postu Administrativu Pantemakassar Oekusi, apoiu kalen kada alunus hodi halo uma ba profesores sira iha Eskola Bazika Filial 1,2,3,4 Nun Ana.
“Hau agradese ba inisiativa Inan Aman alunus sira iha EBF Nun Ana, neebe apoiu kalen no harii Uma ou hela fatin ba profesores nain 3, profesora ida hamutuk profesores nain 4 no Guarda Eskola nain ida iha eskola nee hodi hanorin oan sira,” dehan nia ba jornalista STL iha Nun Ana, Segunda (09/06/2025).
Nia haktuir tan katak, planu governu Autoridade atu halo uma ba profesores sira maibe ho kuantidade Kiik, karik uma 4 hanesan nee uluk mak foin haree iha futuru tuir Planu Asaun Anual Sekretariu Rejional Edukasaun Asuntu Sosial (SREAS).
Iha oportunidade hanesan Xefe Bairru Nun Ana, Aldeia Bausiu Suku Nipane, Kamilus Binsasi dehan, nia hamutuk ho komunidade Bairu Nun Ana, kada alunus ida apoiu kalen ida no kontribui harii uma ba mestre sira neebe mak hanorin sira nia oan iha EBF Nun Ana.
“Ami inan aman alunus sira spoiu kalen hodi harii uma ba mestre sira atu tau matan ba ami nia oan sira nia futuru liu husi dalan ba edukasaun.
Iha oportunidade hanesan Marcos Queno nuudar Koordenador EBF Nun Ana, rekonhese katak komunidade Nun Ana apoiu sira kalen no konstrui uma ba sira hodi hela permanente atu halao prosesu aprendijazen ba alunus sira iha Bairu Nun Ana.
“Ami agradese ba komunidade Bairu Nun Ana neebe apoiu ami harii uma ba profesores sira neebe mak hanorin iha fatin Ida nee,” dehan nia.
Tuir observasaun STL iha Bairu Nun Ana, komunidade sira entuziasmu tebes hodi halo lutu, hamoos areadores eskola nomos asegura bee ho saneamentu.
(jos)
