DILI, STLTIMORLESTE.com – Polísia Nasionál Timor Leste (PNTL) liu husi Diresaun Tránzitu Seguransa Rodaviariu Nasionál (DTSRN) halao atividade operasaun (cek poin) ba transporte neebe iha area juridiku Munisipiu Dili, no konsege prende motor 48 ho dokumentus neebe viola Lei Kódigu Estrada númeru 06/2003 laiha karta kondusaun no lori dokumentu liu ona prazu.
“Ita implementa halo atividade cek poin ba transporte iha area Juridiku Munisipiu Dili nian atu apoiu polísia Tranzitu Munisípiu Dili bele impoin regra Lei Kodigu Estrada ba sidadaun neebe konduz transporte hanesan motor no kareta tenke kumpri ba lei,” hatete Diretor DTSRN Superintendente Assistente Polísia, Luis da Costa ba jornalista sira, Kuarta (05/03/2025).
Nia dehan, iha atividade polísia tranzitu halo check point ba transporte neebe sirkula iha kapitál Dili, ida nee hanesan planu operasaun semanal nian hodi implementa loron-loron iha estrada publiku hodi impoin lei ba transporte publiku.
Superintendente Assistente Polísia nee haktuir tan katak, atividade cek poin nee mos parte ida halo prevensaun ba ema rekonhesidu sira neebe sempre naok motor iha fatin-fatin, hafoin lori ba faan fali iha munisípiu seluk iha territoriu Timor Leste, entaun ho atividade hanesan nee bele halo prevensaun.
“Ohin ita halo operasaun cek poin, ita konsege prende motorizada hamutuk 48 no dokumentu haat (4), neebe sidadaun sira komete infrasaun laiha karta kondusaun, lori dokumentu neebe liu ona prazu, ida nee sira viola lei Kódigu Estrada númeru 06/2003,” nia esplika.
Iha fatin ketak, Motorista Félixa Silva informa, Polisia Tranzitu prende nia motor tanba dokumetus mate tinan ida ona, ohin save ho motor entrega hotu ona ba sira no hein ba selu iha banku depois foti fali.
“Sin, ohin Polisia Tranzitu prende ona hau nia motor tanba dokumetus motor mate tinan ida ona, laiha buat ida, depois mak hau ba selu iha banku foti fali motor,” nia koalia.
Entretantu, motorizada neebe parte DTRSN prende sei asegura iha edifisiu Kuartel Jeral PNTL, wainhira motorizada nain kumpri ona selu koimas iha Banku Nasional Komersiu Timor Leste (BNCTL), hafoin entrega fila fali motor sira nee ba nain.
(jen)
