DILI, STLTIMORLESTE.com – Eskola Ensinu Baziku Sentral (EBC – sigla português) Manleuana seidauk iha edifisiu biblioteka, no daudaun nee iha deit edifisiu provizoriu para bele rai livrus sira nee.
“Ami foin daudaun simu tan meza no kadeira, armariu husi UNICEF, nomos husi Ministeriu Edukasaun, agora daudaun ami sei uza hela sala provizoriu ida iha neeba, maibe gas nee mak durante nee husi kompanhia atu mai foti, maibe too agora seidauk mai, nee duni sala neebe provizoriu ami uza nee hodi tau livru ba, maibe ami nian preokupasaun mak gas nee rai hamutuk ho livru iha sala nee, halo estudantes sira atu asesu livru sira nee susar oituan, neebe ami seidauk iha edisifiu ketak ida ba biblioteka ninia,” haktuir Diretor EBC Manleuana, Carlos Correia ba STL iha nia knaar fatin Manleuana, Kuarta nee (05/03/2025).
Nia hatutan, edifisiu biblioteka, sala provizoriu ida mak sira rai hela livru, kona-ba livru sufisiente ona, maibe fatin nee mak too agora seidauk iha, agora gas mos tau hotu ho livru iha sala nee, oinsa mak estudantes sira atu asesu ba livru sira nee.
Iha parte seluk, Diretor Eskola Sekundariu Jeral no 4 Setembru Balide, Sergio A. da Cruz hatete, sira iha livru ba materia balu sei menus, no sira iha ona sala biblioteka para estudantes sira bele asesu livru neebe rai iha biblioteka.
“Ami nian livru ba disiplina balu mak laiha, no ami nian estudantes sira asesu ba iha livru neebe mak rai ona iha biblioteka,” nia dehan.
(jac)
