EBC Vila Nova Simu Ilhas São João Bosco

Profesores sira iha Eskola Ensinu Baziku Sentral terseiru siklu Vila Nova Baukau, hiit ilhas Sao Joao Bosco. (Foto: STL/EST 2)

BAUKAU, STLTIMORLESTE.com – Estudante no profesores sira iha Eskola Ensinu Baziku Sentral (EBC – sigla portuges) Treseiru Siklu Vila Nova no filial sira Munisipiu Baukau, simu ilhas São João Bosco, neebe rekonhese mestre ba foinsae sira iha mundu.

“Ilhas São João Bosco neebe mai iha Ensinu Baziku Vila Nova, tanba hanesan mestre foinsae sira nian, mai hatudu dalan ba foinsae sira futuru aban bainrua nian, tanba prezensa nee bele motiva estudante sira konhese liu tan São João Bosco,” hatete Diretor Eskola Ensinu Baziku Sentral Vila Nova, Francisco Pinto ba STL iha Vila Nova Baukau, bainhira simu ilhas São João Bosco, Tersa (28/01/2025).

Tuir Fransisco hatene, kona-ba São João Bosco katak, São João Bosco hanesan mestre ba foinsae sira, tanba iha domin boot tebes ba foinsae neebe hanorin foinsae sira atu halo buat diak iha viajen moris.

Reprezentante estudante Felicia da Silva sente kontente ho prezensa ilhas São João Bosco, tanba bele hetan motivasaun foun hodi banati tuir hahalok São João Bosco ba foinsae.

Amu selebrante Aderito Vitor haktuir, São João Bosco sidadaun Italiano neebe iha loron 26 Setembru 1927 liu husi Salezianu sira too iha Timor hodi habelar liafuan diak ba emar sira liu-liu joven Timoroan atu banati tuir, neebe primeiru espedisaun iha Timor lidera husi Frater Calistro Caravalho hodi hanorin Timoroan sira hodi moris tuir vertude São João Bosco.

“João Bosco nia finalidade mak hakarak halibur foinsae sira hahu husi adolesente sira, João Bosco hateten, se laiha joven sira hau labele halo buat ida, tanba nee nia estuda servisu saran aan ba foinsae sira,” hateten Padre Aderito liu husi nia omelia bainhira prezide misa.

Husi São João Bosco nian domin ba foinsae, Padre Aderito husu estudante sira atu esforsu aan estuda no sai estudante neebe diak ba sosiedade no bele promove nafatin sistema kultura Timor nian esklui kultura estranjeiru.

Nunee mos husu profesores sira atu nafatin hanorin estudante ho vontade no domin, tuir São João Bosco neebe hadomi tebes foinsae sira, tanba Ministeriu Edukasaun deside ilhas São João Bosco sai mahein ba Edukasaun Munisipal Baukau.

“João Bosco mahein Edukasaun Baukau nee mak nia vizita eskola atu lori grasa no matenek ba imi, hasai buisole sira, tanba kalan imi ba fali grupu, tanba nee tenke tuir João Bosco nia hakarak sai sarani neebe diak,” hateten Padre Aderito

Amu selebrante nee husu sarani Katoliku sira iha TimorLeste, liu-liu joven sira atu tau esperansa ba São João Bosco bainhira hasoru difikuldade iha viajen moris, tanba São João Bosco mak Santu neebe hadomi foinsae sira iha mundu.

Durante observasaun STL nian iha terenu nota katak, hafoin translada ilhas São João Bosco husi Igreja Katedral Santu Antonio Vila Antiga ho karreta Hilux kor mutin neebe hetan akompanhamentu husi estudante no profesores sira no apoiu seguransa masimu husi Komando Polisia Munisipiu Baukau too iha resintu eskola EBC Vila Nova.

(EST 2)

Share it :

Leave a Reply

Your email address will not be published. Required fields are marked *