AMBENO, STLTIMORLESTE.com – Eskola Bazika Filial Kutete, too fulan Junhu tinan 2025, sedauk hetan programa merenda eskolar faze II.
Kestaun nee hatoo husi Koordenador EBF Lalehan Kutete, Anton Sobe ba STL Iha Serimonia Selebrasaun dalan ba Eskola Susesu, programa Edukasaun no Nutrisaun-Hatutan neebe realiza husi Care, Mercy Corps ho Governu Autoridade Rejiaun Administrativa Espesial Oekusi-Ambeno (RAEOA) iha Eskola Bazika Filial (EBF) Nun Ana, Suku Nipane, Postu Adminstrativu Pantemacassar Oekusi, Segunda (09/06/2025).
Nia dehan, programa Merenda Eskolar iha etapa primeiru, mai husi NGO Hatutan neebe maka finansia husi Governu Estadus Unidus Amerika (EUA) ba trimestral primeiru hahu husi fulan Janeiru, Fevereiru too Marsu 2025, maibe iha etapa segundu nee, responsabiliza husi estadu Timor Leste (TL), liu husi Ministeriu Edukasaun (ME), tanba nee iha Sekretaria Rejional Edukasaun no Asuntu Sosial (SREAS), ba etapa segundu sedauk realiza, maibe rona ona informasaun katak iha tempu badak sei realiza hodi fornese aihan nutritivu ba labarik estudante sira.
Iha sikun seluk, Eskola bazika Central Oesilo, suku bobometo sub-rejiaun oesilo RAEOA, seidauk asesu implementasaun programa merenda eskolar faze daruak.
Diretor EBC Oesilo, Francisco Ais informa, iha faze primeiru, EBC Oesilo konsege asesu ona ba programa merenda eskolar neebe subtitui husi Care Hatutan, hodi implementa programa merenda eskolar, maibe iha faze daruak nian too ohin loron governu RAEOA seidauk implementa ba iha eskola refere, tanba nee husu ba parte kompetente atu bele kontinua implementa programa refere ba iha EBC Oesilo, nunee bele fasilita estudante sira, merenda perante prosesu aprendizajen.
Hatan ba prekupasaun merernda Eskolar sedauk realiza, Diretor Rejional Edukasaun no Asuntu Sosial (DREAS) Vincencio Cono esklarese katak, too ohin loron implementasaun programa merenda eskola iha RAEOA, foin, hahu uluk ba Pre-Eskolar no Ensinu Bazika Filial maibe ba EBC sira iha territoriu RAEOA seidauk implementa tanba failhansu tekniku husi parte finansa RAEOA, transfere sala osan, tama iha konta bankaria eskola seluk nian, tanba nee sei prosesu transferensia orsamentu tanba dadaun nee sei halo verifikasaun hafoin bele implementa.
Nunee mos Xefe Departamentu Apoiu Asaun Sosial, Diresaun Edukasaun Raeoa, sanchia da Costa Neves, dehan, too ohin loron implementasaun programa merenda eskola iha RAEOA, foin hahu uluk iha pre-eskolar no Ensinu Bazika Filial, enkuantu ba EBC sira iha territoriu RAEOA, seidauk implementa tanba fallansu tekniku husi parte finansa RAEOA, neebe sei iha prosesu transferensia orsamentu no sei halo verifikasaun hafoin bele implementa.
Entretantu, daudaun nee governu rejional hahu ona implementa ona programa merenda eskolar faze daruak ba eskola sira hanesan pre-eskolar eskola bazika filial balun no EBC sira seidauk implementa tanba sei iha prosesu verifikasaun.
Total aloksaun orsamentu ba programa merenda eskolar faze daruak, hamutuk US$ 429,039.24 no husi total orsamentu nee, responde ba estudante, durante loron 53, efetivu, kobre husi pre-eskolar, eskola filia no ensinu baziku, hamutuk nain 19.734.
(jos)
