AMBENO, STLTIMORLESTE.com – Eskola Bazika Filial (EBF) primeiru ano too kuatru Ano Nun Ana, neebe lokaliza Bairru Nun Ana, Aldeia Bausiu, Suku Nipane, Postu Administrativu Pantemakassar, Rejiaun Administrativu Espesial Oekusi-Ambeno (RAEOA) sai primeira lugar programa dalan ba eskola susesu.
Tuir Xefe Programa Edukasaun Nutrisaun Hatutan, implementa husi parte CARE-Mercy Corp ho fundu husi Governu Amerikanu, Nicole Seybel ba STL iha Serimonia Selebrasaun dalan ba Eskola Susesu, programa Edukasaun no Nutrisaun-Hatutan neebe realiza husi Care, Mercy Corps ho Governu Autoridade Rejiaun Administrativa Espesial Oecusse-Ambeno (RAEOA) iha Eskola Bazika Filial (EBF) Nun Ana, Suku Nipane, sente apresia tanba eskola nee hetan eskolhamentu sai vensedor primeiru lugar tanba programa neebe durante nee halao iha area rurais, komunidade iha Bairru Nun Ana, ativu tebes hodi kontribui apoiu oan sira iha prosesu aprendizase husi lee no hakerek.
“Hau apresia tanba inan aman mos bele partisipa iha eskola hodi halo progresu diak iha abilidade labarik lee, nee jestaun eskola, saude eskolar neebe eskola moos, organizadu, bee tama iha haris fatin neebe diak hodi alunus sira fase liman ho sabaun, tuir politika Ministeriu edukasaun hamutuk ho ministeriu saude. Hau nuudar Xefe Edukasaun ba nutrisaun husi Hatutan, serbisu hamutuk ho Ministeriu Edukasaun, Ministeriu Saude nomos Ministeriu Administrasaun Estatal, ho programa neebe maka atu remata, serbisu hamutuk iha Rejiaun Administrativa Espesial Oekusi-Ambeno desde tinan 2023 too agora,” dehan nia.
Nia hatutan, ohin eskola nee hatudu progresu neebe diak, iha area lideransa eskola, Konselhu Inan Aman Responsavel (KIAR) mos ativu iha eskola, tau matan ba merenda eskolar, tau matan ba funsionamentu ba eskola, ida nee fo dalan diak loos ba alunus sira.
Iha oportunidade hanesan, Diretor Rejional Edukasaun ba Asuntu Sosial Vincencio Cono dehan, iha edukasaun iha tipu tolu maka edukasaun informal, konvida inan aman atu tau matan ba ninia oan, atu lori oan sira mai eskola, atu hadomi ninia profesor sira, hadomi oan, tuur hamutuk iha uma, han karik bolu malu hodi haan hamutuk, labele laen han ket-ketak, oan han ket-ketak tanba oan sei badiu tuir artemarsiais too kalan boot maka foin tama uma. Edukasaun formal, hahu husi pre-eskolar, mai too ensino baziku, ensino sekundariu, tekniku vokasionais ate ensino superior sira. Ida nee dalan ida, atu halo mudansa ba rai ida, laliu husi buat seluk, maibe liu husi dalan edukasauan maka foin muda buat ruma, tanba tama ona husi lee, hakerek no sura, bele haree fatin seluk, mesmu konta istoria deit. Edukasaun non formal maka kada tinan-tinan iha Oecusse, ka iha fatin-fatin, sempre ejiste fatin formasaun, hanesan formasaun ba lingua inglesa, lingua Portuguesa, komputador nomos iha sentru treinamentu iha Bansone, Sekretariu Estadu Formasaun Profesional nia knuuk, iha formasauna oinsa bele servii ema ka ospitalidade, balun iha kanalizasaun, balun iha mekanika nomos balun iha artistika hodi hetan sertifikadu atu atinji ninia mehi aban bain rua.
“Hau husu ba lider komunidade, lider igreja iha Nun Ana, hodi fo apresiasaun ba Diretor Edukasaun Rejional Oecusse, Matebian Justino Neno neebe iha momentu neeba harii eskola iha area rurais, maka ohin ita hahu kontinua ninia obra no ohin EBF Nun Ana maka sai bensedor primeiru lugar dalan ba eskola susesu,” dehan nia.
Ohin CARE-Hatutan neebe iha loron 30 fulan Marsu sira nia programa hotu ona, maibe sira nia obra sei la hotu iha Bairru Nun Ana tanba antes nee, sira husik hela programa oi-oin, mesmu sira loron ikus halao programa iha nee, maibe sira laos loron ikus, tempu mak fahe malu, maibe rekordasaun oi-oin neebe sira husik hela iha nee, sei nafatin hela ba povu.
Nunee mos Koordenador EBF 1,2,3,4 Nun Ana, Marcos Quebo dehan, programa neebe maka halao husi CARE-Hatutan durante tinan rua iha eskola ida nee, laos deit ba programa merenda eskolar, maibe sira mos apoiu iha parte pedagojia, oinsa ajuda manorin sira, halo planu liu-liu jestaun iha sala de aula, iha eskritoriu, nuudar koordenador ka xefe eskola sira nia serbisu, iha nee sira apoiu tebes, oinsa liga ho komunidade, ho profesor sira atu serbisu hamutuk.
“Ho implementasaun programa iha eskola no durante nee ami lao tuir too susesu, ida nee laos halao deit programa CARE-Hatutan deit, maibe CARE lafaek mos apoiu tebes ami liu husi literasia no numerasia neebe tau tiha ona iha neeba, hodi apoiu ba manorin sira, fasilita sira iha prosesu de aprendizajen,” dehan nia.
Tuir observasaun STL iha Serimonia Selebrasaun dalan ba Eskola Susesu, programa Edukasaun no Nutrisaun-Hatutan neebe realiza husi Care, Mercy Corps ho Governu Autoridade Rejiaun Administrativa Espesial Oecusse-Ambeno (RAEOA) iha Eskola Bazika Filial (EBF) Nun Ana, Suku Nipane, simu ukun nain sira husi Sekretariu Rejional Edukasaun no sosial ho lia dadoli (takanab husi lia nain sira, bidu no tara tais, tebe dai kultura Oecusse (Bsoot), nunee hahu serimonia importante nee, iha mos kuiz hetan premiu oi-oin, nunee remata ho entrega premiu oi-oin ba lideransa eskola no komunidade bairru Nun Ana neebe sai primeiru lugar ba selebrasaun dalan ba eskola susesu programa edukasaun no nutrisiaun iha tinan nee.
(jos)
