BAUCAU, STLTIMORLESTE.com – Servisu Munisipal Edukasaun Baucau nota, projetu konstrusaun edifisiu eskola Ensinu Baziku Filial (EBF) Haulela Sarabala, iha Suku Lelalai, Postu Administrativu Matebian, Munisipiu Baucau, ho valor orsamentu US$ 129.680,90 neebe konstrui iha tinan 2023 too ohin loron seidauk finaliza no material konstrusuan balu hetan estragus, tanba mosu dezentendimentu entre grupu komunitariu ho Autoridade Suku Lelalai.
Diretor Servisu Munisipal Baucau, Afonso dos Santos da Costa aprezenta, projetu konstrusaun EBF Sarabata nuudar projetu komunitariu husi Programa Konstrusaun Reabilitasaun no Infraestrutura Edukativa (PKRIE) faze daruak neebe ministeriu aloka ba Munisipiu Baucau hamutuk 11 inklui konstrusaun EBF Sarabata neebe konstrui ho valor orsamentu US$ 129.680,90 lansa iha tinan 2023, maibe husi projetu 11, projetu 9 finalizadu no pre-eskolar iha Postu Baguia hein instalasaun fiu eletrisidade kompleta ba 100%, enkuantu EBF Sarabata seidauk finaliza, tanba mosu dezentendimentu entre grupu komunitariu implementador projetu ho Autoridade Suku Lelalai.
“Sarabata nee ita hotu akompanha durante konstrusaun nee iha problema akontese, tanba dezentendimentu entre lider komunitariu ho grupu komunitariu nee, entaun ita tun rezolve problema nee too Autoridade PIDI ba rezolve prosesu seidauk hotu, entaun halo sasan sira hanesan sementi estraga, tanba dezentendimentu Xefe Suku ho grupu komunitariu nee, ida nee mak difikulta,” hateten Diretor Servisu Munisipal Baucau, Afonso dos Santos da Costa ba STL iha nia knaar fatin, Tersa (09/06/2026).
Nia esplika, dezentendimentu nee mosu iha faze konstrusaun parte fondasi nian neebe konstrui iha tinan 2024, tanba Autoridade Suku ho grupu komunitariu implementador projetu ladun servisu hamutuk no la konsidera malu, maibe hafoin prezensa Servisu Munisipal Edukasaun Baucau no Autoridade Munisipal tenta rezolve dezentendimentu refere konsege konstrusaun lao kontinua too ohin loron.
Nia komenta, projetu refere daudaun kontinua lao no akompanha husi tekniku sira edukasaun.
“Projetu paradu nee laloos ida, tanba ita rezolve problema nee mak agora sira lao ba sinta jeral leten nee,” Afonso argumentu.
Nia rekonhese, prosesu konstrusaun EBF Sarabata lao lentu, tanba progresu fiziku ba konstrusaun EBF Sarabata atualidade foin atinji 23%, maibe hatarde prosesu konstrusaun refere kauza husi dezentendimentu.
Nia deklara, progresu atual neebe iha, Ministeriu Edukasaun foin halo pagamentu dahuluk no bainhira grupu komunitariu sira servisu konstrusaun nia fiziku atinji ona 25%, mak ministeriu sei halo tan pagamentu faze daruak nian.
“Ita husu para sira aselera projetu nee. Maske hetan difikuldade mais importante mak hotu, mais ami iha esperansa katak sei hotu, tanba orsamentu segundu faze seidauk sai,” Afonso rekomenda.
Too notisia nee publika, liga asuntu dezentendimentu entre grupu komunitariu implementador projetu ho Autoridade Suku, STL seidauk hetan konfirmasaun husi Autoridade Suku Lelalai.
(tom)
