BAUKAU, STLTIMORLESTE.com – Eskola Ensinu Baziku Filial (EBF) Primeiru, Segundu no Terseiru Siklu Bukoli, Postu Administrativu Baukau Vila menus profesores, obrigatoriu akumula estudante nain 56 iha sala ida.
Koordenadora EBF Bukoli, Leonilda Boavida da Costa esplika, EBF Bukoli kompostu Primeiru, Segundu no Terseiru Siklu akumuladu estudante hamutuk 456, maibe profesores responsavel materia ativu nain 14, nain 1 moras permanente, tanba nee la responde ba kualidade edukasaun iha nivel eskola.
“Iha ami nia eskola menus profesores, halo orariu fahe profesores la too, entaun sala ida ami tau hamutuk too nain 56, ita buka kualidade edukasaun susar la halimar,” hateten Leonilda ba jornalista sira iha Bukoli, Kuarta (04/06/2025).
Nia konta, primeiru anu fahe ba sala rua kada sala total estudante nain 32, segundu anu nain 46, terseiru anu fahe ba sala rua kompostu sala primeiru nain 30 no segundu nain 27, kuartu anu nain 52, kintu anu fahe ba sala rua kada sala estudante nain 28.
Sestu anu estudante nain 38, setimu anu nain 56, oitavu anu nain 36 no nonu anu fahe ba sala rua, sala primeiru akumula estudante nain 25 no sala segundu akumula estudante nain 26.
“Tuir regras edukasaun kada sala ida akumula estudante nain 35, maibe iha nee sala rua ami akumula liu 50, setimu anu 56 no kuartu anu nain 52,” Leonilda akresenta.
Koordenadora eskola nee relata, EBF Bukoli iha sala aprendizajen hamutuk 14 no tuir regras Ministeriu Edukasaun kada sala akumula estudante nain 35 ho objetivu atu eleva kualidade edukasaun, maibe tarjetu refere EBF Bukoli la prienxe, tanba menus profesores nunee sala balun tenke akumula estudante too nain 56.
Tuir nia, akumula estudante iha sala ida liu regras edukasaun la fo benefisiu ba estudante atu tuir prosesu aprendizajen masimu, tanba estudante barak neebe kria barulhu difikulta profesores materia atu kontrola.
“Preokupasaun nee hau halo karta manda direira ba Ministra, tanba uluk iha nee profesores nain lima estudante nia inan aman fo ajuda, maibe tuir teste liu nomeasaun ba fatin seluk,” nia konta.
Leonilda katak, profesores tempu parsial nain lima neebe antes hanorin iha eskola refere apoiu finanseiru husi inan aman, tuir lo-loos liu selesaun iha teste bolsa kandidatu, Ministeriu Edukasaun tenke koloka hikas ba EBF Bukoli hodi reforsa prosesu aprendizajen, maibe koloka fali ba eskola seluk, nee sei fo impaktu ba prosesu aprendizajen iha tinan 2026, tanba iha profesores nain lima naran tama iha lista reformadu.
“Hau tenta nafatin halo karta diriji ba Edukasaun Munisipiu atu haree, deklara mos bazeia ba profesores nain lima neebe tama mos iha idade reforma, tama reforma hau sei hasoru dezafiu,” Leonilda fundamenta.
(tom)
