BAUCAU, STLTIMORLESTE.com – Eis prizioneiru Cipinang husi Munisipiu Baucau husu Prezidente Republika (PR) José Ramos Horta no Primeiru Ministru (PM) Kay Rala Xanana Gusmão atu fo medalha por meritu ba sira.
Porta voz eis prizioneiru Domingos Sávio Freitas aprezenta, relasiona luta libertasaun nasional durante tinan 24 hasoru invazasaun Indonezia iha Timor Leste mosu reasaun oin oin inklui asaltu Polisia Brimob Indonezia ho kareta Mercedes Hino ida iha area Mumana, Suku Abafala, Postu Administrativu Quelicai, Munisipiu Baucau, iha loron 31 Maiu 1997 rezulta Polisia Brimob nain 17 mate no nain 5 kanek enkuantu kareta refere no kilat, pistola rezulta mutuk iha fatin akontesimentu.
Nia sublina, insidente nee akontese lidera husi Sub-Xefe Estadu Maior David Alex “Daitula” iha neebe objetivu atu impede prosesu eleisaun Prezidensial neebe realiza iha loron 31 Maiu 1997, maibe iha insidente nee joven feto no mane hamutuk nain 125 husi Suku Baguai, Letemumo, Lacoliu, Uaitame, Abafala, Guruça, Macalaco, Laisorulai no Buibau sai vitima ba insidente refere, tanba joven feto no mane nain 21 husi total refere hetan kapturasaun husi militar Indonezia, iha neebe feto nain tolu, nain ida kastigu durante fulan tolu iha Dili no feto nain rua kastigu iha Quelicai enkuantu mane nain 18 kadeia tinan tolu iha Cipinang Indonezia hafoin hetan indultu iha tinan 1999.
“Iha okaziaun ida nee ami eis prizioneiru Cipinang rekomenda ba Prezidente Republika no Primeiru Ministru atu fo konsidera ami eis prizioneiru hamutuk ema nain 18 hetan amnestia internasional iha kadeia Cipinang ho medalha por meritu,” Porta voz eis prizioneiru, Domingos Sávio Freitas hatete liu husi Konferensia Imprensa neebe realiza iha monumentu Mumana Quelicai, Domingu (31/05/2026).
Iha fatin hanesan, responsavel sub-kaixa kalvoari nuudar mos Vise Sekretariu membru OJETIL, João Bosco Ximenes “Maulesa” akresenta, kazu asaltu Polisia Brimob nain 17 mate, nain 5 kanek no kareta Mercedes Hino ida mutuk iha fatin akontesementu, nuudar susesu husi operasaun konjunta neebe involve husi frente armada no frente kladestina konsege marka istoria iha Mumana, Quelicai no vitima ba insidente refere kuaze joven barak, balu hetan kastigu tinan barak iha Cipinang Indonezia, maibe hafoin Timor ukun aan tinan 24 seidauk hetan kondekorasaun hanesan maluk seluk neebe hetan kondekorasaun medalha por meritu iha selebrasaun loron 20 Maiu tinan nee.
“Ami nia observasaun Governu liu husi Ministru Konselhu Kombatentes Libertasaun Nasional fo ona medalha por meritu ba sira selu-seluk ate ita nia maluk neebe hakarak integrasaun mos hetan medalha por meritu, nee kestaun politika oinsa, maibe ami sira iha nee seidauk hetan medalha, tanba ida nee mak ami ezije,” Maulesa kestiona.
Aleinde nee mos nia aprezenta, relasiona kazu asaltu refere rezulta joven feto mane iha momentu neeba barak sai vitima, maibe hafoin hetan ukun aan too ona tinan 24, Estudu Timor Leste liu husi Governu seidauk fo rekonhesimentu ba sira nia sakrifisiu.
Nunee husu Governu liu husi Ministeriu Asuntu Kombatentes Libertasaun Nasional atu fo rekonhesimentu ba vitima sira, tanba balu naran hahu rejistu iha tinan 2003, 2005 no too iha tinan 2009, maibe seidauk hetan rezultadu, tanba nee husu bainhira Ministeriu Asuntu Kombatentes Libertasaun Nasional liu husi Konselhu Kombatentes Libertasaun Nasional fo rekonhesimentu ba vitima asaltu Polisia Brimob iha Mumana, tenke fo rekonhesimentu ho pensaun subsistensia 8a14 ba leten.
(tom)
