BAUKAU, STLTIMORLESTE.com – Ema deskonhesidu soe bebe mane ida iha Area Dae-Isi, Aldeia Caeasamutu, Suku Buruma, Postu Administrativu Baukau Vila, Munisipiu Baukau, ho kondisaun diak.
Kronolojia ema deskonhesidu soe bebe nee, iha loron 28 Abril 2025, tuku 03:00 madrugada OTL, neebe soe iha uma komunidade Benedita Maria da Silva nia odamatan oin rezidensia Dae-Isi Buruma.
“Hau sei toba, ema tuda uma dala rua, hau hader hodi tuur, maibe tuda tan uma mak hau sai foti lampra loke odamatan lao sai pasta ida iha odamatan oin, hau leno uma sorin-sorin ema laiha, hau mai fali foti ai-suak sukit pasta nia talin mak bebe oan nee iha pasta laran tanis, nee mak hau halai ba bolu kuinada sira,” haktuir Bendita Maria da Silva ba jornalista sira iha Hospital Rejiobal Eduardu Ximenes (HoREX), Segunda nee (28/04/2025).
Hafoin Bendita Maria da Silva sukit pasta tali, maibe derrepente rona bebe tanis iha pasta laran, nia parte fo hatene kedas familia no kontinua hatoo informasaun ba Autoridade Seguransa Munisipiu Baukau hodi evakua bebe refere ba HoREX Baukau.
Bendita nuudar ema dahuluk salva bebe nee hateten, prontu kontribui prosesu dalan legal, maibe atu fo fila bebe ba inan rasik la koopera, tanba bebe refere laos hili iha dalan, maibe inan deskonhesidu rasik entrega liu husi soe hela bebe iha odamatan oin.
“Nee prosesu lai, ami moos laos ba hili iha dalan, ga foti, maibe sira mak hakarak direitamente mai tau ami nia uma oin,” katak Bendita Maria da Silva.
Doutora Servilia neebe simu bebe refere husi Bendita Maria da Silva iha HoREX Baukau hateten, bebe refere ho kondisaun diak, maibe afeta ba kondisaun hipotermia, tanba bebe isin hetan malirin, nunee mediku sira foti medida hodi transfere bebe refere ba inkuvator hodi hetan tratamentu.
“Bebe agora iha inkuvator, nia presu normal hela, agora la hipotermia ona, normal fali ona, maibe kuandu la lais bebe sei monu perigu ba vida, maibe sorte familia neebe hetan lori lalais mai,” Doutora Servilia akresenta.
Bebe mane refere, Doutora Servilia fo naran Apriliano, daudaun kontinua halo tratamentu iha HoREX no toba iha inkuvator laran ho temperatura skin 34.4 Celsius, temperatura seting 35.0 Celsius, temperatura Air 35.9 Celsius no Humidity 34 neebe daudaun bebe refere kontinua akompanha husi inan Bendita Maria da Silva.
(tom)
