DILI, STLTIMORLESTE.com – Embaixador Brunei Darussalam iha Timor Leste, Wan Hadfi Lutfan despede malu ho Prezidente Republika Jose Ramos Horta, tanba konklui ona nia mandatu.
Prezidente Republika, Jose Ramos Horta simu Wan Hadfi Lutfan, Embaixador Brunei Darussalam iha Timor Leste, ba konvokatoriu despedida iha Palasiu Prezidensial.
Embaixador Lutfan hahu nia knaar iha Junhu 2022, konklui ona nia misaun diplomatika iha Timor Leste no sei simu kargu foun iha Brunei. Prezidente rekonhese servisu Embaixador nian no trajetoria pozitivu relasaun nian durante nia mandatu.
Embaixador Brunei Darussalam iha Timor Leste, Wan Hadfi Lutfan ba jornalista sira iha palasiu Prezidensial Nikolao Lobato, Bairo Pite, Tersa (27/05/2025) hatete, ohin mai hasoru malu ho Prezidente Republika hodi halo despedida tanba nia remata ona nia mandatu nuudar Embaixador.
“Ohin mai hasoru Prezidente Republika hanesan despedida tanba hau nia mandatu nuudar Embaixador remata ona,” katak Embaixador Brunei ba Timor Leste.
Durante enkontru nee, Embaixador Lutfan refleta kona-ba progresu signifikativu iha relasaun bilateral, partikularmente iha tinan tolu ikus nee.
Embaixador sublina vizita Estadu Sua Majestade Sultan Brunei Darussalam mai Timor Leste iha tinan 2024 no vizita Estadu Prezidente Ramos Horta nian ba Brunei iha fulan Novembru tinan 2023 nuudar momentu pivotal. Interkambiu nivel aas sira nee, nia nota, hamosu konsiensia no interese konsideravel entre setor publiku no privadu sira husi nasaun rua nee.
Embaixador sesante nee mos destaka kooperasaun neebe lao daudaun no dezenvolve hela, hodi temi vizita nivel aas oin-oin no enkontru ministerial sira neebe foka ba hasae kolaborasaun iha setor xave sira hanesan saude, edukasaun, industria petroleu no gas, no konetividade area.
Prezidente Ramos Horta hatoo apresiasaun ba Embaixador Lutfan nia esforsu dedikadu hodi hametin relasaun Timor Leste ho Brunei Darussalam no dezeja susesu ba nia esforsu sira iha futuru.
(eme)
