DILI, STLTIMORLESTE.com – Eskola hotu tantu publiku, privadu no katolika, idak-idak iha ninia regras hodi bele halo kontrolu ba profesores sira.
Haktuir Diretor Eskola Sekundariu Nobel da Paz, Jeremias P. de Jesus ba STL iha nia knaar fatin, Kuarta nee (05/03/2025).
“Eskola Nobel hanesan eskola privadu, ami iha regras, atu nunee bele halo kontrolu ba ami nian profesores sira, hau hanoin eskola hotu-hotu iha ninia regras para halo kontrolu ba profesor sira, ho ida nee profesores kada disiplina idak-idak tama tuir oras neebe estabelese ona iha orariu, maibe durante nee ami nian profesor sira sempre kumpri oras tama eskola no sai, nee sira sempre kumpri,” dehan nia.
Jeremias dehan, profesores tenke kumpri oras hanorin nian, tanba nee kada loron husi eskola mos nafatin halo kontrolu ba profesores sira, oinsa dader tama sedu, nunee mos oras sai ninia mos tenke kumpri nafatin, nee importante tebes.
“Iha orariu no regras husi edukasaun hanesan, tanba regras 24 oras, nee duni profesores sira preaiza kumpri regras neebe mak iha, tanba 24 oras por semana nee tenke kompletu, kuandu la kumpri nee kestaun seluk, maibe hau nian profesor sira kumpri regras,” nia afirma.
Iha fatin seluk, Diretor EBC Manleuana, Carlos Correia dehan, kona-ba kontrola profesores nee adjuntu ninia servisu, nuudar Diretor Eskola halo kontrola deit enjeral, maibe profesor hotu halao tuir regras, nee mak tama eskola no sai tuir oras, karik moras ou iha asuntu importante ruma, nee presiza fo hatene ba parte eskola hodi bele hatene informasaun.
“Hau hanoin kona-ba kontrola profesores nee adjuntu ninia servisu, nuudar Diretor Eskola halo kontrola deit enjeral, maibe profesor hotu halao tuir regras, nee mak tama eskola no sai tuir oras, karik moras ou iha asuntu importante ruma, nee presiza fo hatene ba parte eskola hodi bele hatene informasaun,” dehan nia.
(jac)
