Eskola Munisipiu Likisa, Profesores 39 Tama Idade Reforma

Ilustrasaun (Foto: Jurnal)

DILI, STLTIMORLESTE.com – Tinan nee profesores husi eskola sira Munisipiu Likisa hamutuk 39 tama ba idade reforma, maibe too agora sira seidauk hatama karta rekerimentu ba Ministeiru Edukasaun (ME).

Kestaun nee hatoo husi Diretor Edukasaun Munisipiu Likisa, Julio da Silva ba STL liu husi telefone, Tersa nee (28/01/2025).

“Idade reforma, ita provizoriu prepara hela 39 pesoas, husi idade 65 too 83, nee husi nível eskolaridade hotu, hau la defini eskola neebe-neebe, tanba hau tau dadus jeral deit, nee mak ita nian profesores hamutuk 39, hau kategoria hela tinan atu tama reforma ninia, nee mane 35 no feto nain 4,” nia afirma.

Nia dehan, profesores 39 nee too agora seidauk hatama karta rekerimentu ruma ba ME, no sira halao knaar iha eskola lao hanesan baibain, halao aprendizajen ba estudante sira, numeru lista reforma profesores iha Likisa mak hamutuk 39.

Nunee mos Diretor Edukasaun Munisipiu Manatuto, Patricio da Cruz Quintao hatete, dadus reforma profesores iha Munisipiu Manatuto nee iha, maibe total hira nee presiza konfirma ho rekursu umanu, hafoin bele fo dadus lo-loos nee hira.

Entretantu Diretor Edukasaun Munisipiu Ainaro, Patricio da Costa Magno dehan, kona-ba profesores reforma nee iha, maibe agora daudaun lao viajen servisu nian, neebe ninia total nee hira la lembra ida.

(jac)

Share it :

Leave a Reply

Your email address will not be published. Required fields are marked *