DILI, STLTIMORLESTE.com – Maioria estudantes husi eskola Munisipiu Manatuto seidauk uza farda nasional no sira sei kontinua uza farda anterior, maibe eskola balun hahu pesan ona farda.
Kestaun nee hatoo husi Diretor Servisu Edukasaun Munisipiu Manatuto, Patricio da Cruz Quintao ba jornalista STL liu husi telefone, Kuarta nee (11/06/2025).
“Kona-ba uniforme, buat nee husi ita nian ministeriu, agora diretor sira husu mai ita iha diresaun atu fo orientasaun ba farda ida neebe estudantes hotu bele asesu, karik sosa ho osan neebe kiik liu, sira balun konfundu ho informasaun sala nee dehan buat nee sei iha faze diskusaun, tanba nee estudantes iha Manatuto maioria seidauk uza farda nasional,” nia haktuir.
Patricio dehan, estudantes sira seidauk uza uniforme nasional, tanba nee sira sei uza nafatin farda anterior ninia, maibe husi eskola balun mak foin hahu pesan ona farda no estudantes hotu iha Manatuto seidauk uza uniforme nasional.
Iha fatin seluk, Diretor Servisu Edukasaun Munisipiu Likisa, Julio da Silva dehan, estudantes nivel sekundariu iha Munisipiu Likisa balun mak hahu uza ona farda eskola, agora eskola hira mak uza ona nee, ninia dadus seidauk hatene, tanba presiza halo identifikasaun.
“Uniforme eskola mak halo, laos edukasaun, husi edukasaun garante deit nia uniformidade, maibe atu kontaktu ho kompanhia nee eskola mak hatene. Agora daudaun eskola balun uza ona, seidauk hatene eskola hira mak produs ona sira nian farda ba ita nian estudantes sira,” dehan nia.
Iha fatin seluk, Sekretariu Estadu Ensinu Sekundariu Jeral no Ensinu Tekniku Vokasional, Domingos Lopes Lemos dehan, lei mos fo dalan atu sosializa ba inan aman sira kona-ba uniforme nasional nee, tanba nee mak profesor sira ba halo enkontru ho inan aman estudantes sira.
“Hau hanoin farda nee laos ita ba husu deit, nee iha eskola neebe deit ita sosa netik, farda nee iha pakote rua, ida ba desportu nian nee buat ketak ida nomos ida regularmente estudantes sira uza iha loron Segunda, Tersa no Kuarta, nee buat ketak ida, farda iha oin rua, maibe la taka dalan, karik inan aman iha posibilidade farda ida regular ka ofisial ida uza nee bele iha rua para sira bele uza troka, nee depende ba inan aman sira nian konsiénsia rasik,” nia dehan.
(jac)
