DILI, STLTIMORLESTE.com – Membru RENETIL, Joaquim “Russuo” da Fonseca anunsia ninia intensaun atu kompete iha eleisaun Prezidensial Periodu 2027-2032.
Joaquim “Russuo” da Fonseca hatete, nia foti desizaun atu anunsia ninia interese atu kandidatu aan ba Prezidente Republika, tanba haree situasaun iha rai laran neebe lao ladun diak durante nee.
Tuir nia, hanesan Timor oan ida iha sentidu no dever oinsa kontribui liu husi eleisaun demokrasia hodi kontribui hadia Timor Leste neebe oras nee ultrapasa hela situasaun ida neebe ke difisil tebe-tebes
“Hau nia observasaun Timor Leste oras nee daudaun hasoru hela dezafius estruturais no governansia neebe boot, se ita la halo mudansa melhoramentu signifikativus mak ba oin sei sai aat liu tan,” hatete nia liu husi konferensia imprensa neebe halao iha sede Farol, Kinta (23/07/2026).
Nia hatutan, presiza hadia integridade estadu nian liu husi enkuadramentu juridiku iha instituisaun sira, se lae futuru nasaun nee sei lao la tuir saida mak uluk eroi sira mehi hodi luta ba nasaun nee, liu-liu fo moris diak ba povu.
“Wainhira ita la hadia enkuadramentu juridiku no integridade instituional mak problema sira nee sei sai aat liu tan iha loron sira tuir mai, sei halo ita nia estabilidade nasaun, futuru ekonomiku no fundasoens ba demokrasia iha Timor Leste nee iha risku neebe boot liu tan,” dehan nia.
Nia sublina, atu rezolve problema kompleksu neebe iha ita nia rain presiza lider ida neebe mak iha prinsipiu vizionariu responsivu hodi atentu ba situasaun sira neebe ke ita nia rain hasoru.
Nia mos dehan, maske anunsia ona ninia intensaun kandidatura, ba oin sei halo koordenasaun ho apoiante sira hodi haree preparasaun sira tuir mai molok ofisializa ninia kandidatura.
(alb)
