DILI, STLTIMORLESTE.com – Relasiona ho estatutu Guarda Prizional sira nian neebe too agora seidauk hetan aprovasaun, Ministru Justisa deklara katak, halo ona re-ajenda hodi diskute.
“Estatutu Guarda Prizional iha ajenda ona, ita komesa atu hatama fila fali ba Konselhu atu re-ajenda hodi halo diskusaun iha fulan sira besik nee iha Konselhu Ministru atu aprova, ita bele halo implementasaun iha tinan oin,” dehan Ministru Justisa Sergio Hornai ba jornalista sira iha Edefisiu MJ, Segunda (09/06/2025).
Nia hatutan, kona-ba alterasaun kodigu penal no kodigu prosesu penal iha ona faze final, balu halo tiha ona, tanba kodigu prosesu penal presiza mos iha lei komplementar balu liu-liu krimi sebernetika nian, no mos lei protesaun dadus pessoal no mos krime Insestu.
Sublina, Parlamentu halo ona nia audensia publika no Governu iha ona faze final ida atu halo submisaun ba iha Konselhu Ministru hodi apresia aprova hodi halo submesaun ba iha Parlamentu Nasional.
Antes nee Diretor Prizaun Suai, Rui Gonçalves dehan, estatutu Guarda Prizional nian importante tebes atu sai mata dalan iha ba iha sira.
“Estatutu Guarda Prizional iha alterasaun, tanba nee sei prepara hela atu aprezenta ba segunda parte, sujere ba nai ulun sira atu haree ba estatutu nee,” dehan nia.
Hatutan, estatutu nee laos buat ida neebe foun, maibe estatutu nee sai hanesan matan dalan neebe forte, atu iha kareira prizional bele avansa tuir buat neebe iha, se la iha estatutu guarda sira sei iha hela difikuldade.
Aleinde nee Diretor Prizaun Gleno, Cristiano Salsinha katak, guarda prizional sei hela ho duvidas kona-ba estatutu sira nian, tanba nee sujere atu ba oin bele haree oinsa atu buka solusaun ba estatutu nee.
“Dehan halo alterasaun maibe besik tinan ida ona seidauk iha informasaun mai ami, ami guarda prizional hela ho duvidas, ida nee mak sai difikuldade mai ami guarda antiguidade,” nia fundamenta.
Nia hatutan, sira barak servisu iha tinan 2000 too agora seidauk iha estatutu ida hodi regula sira, tanba nee fo hanoin ba iha Ministeriu Justisa liu husi Diresaun atu aselera kona-ba alterasaun estatutu nee.
Esplika, tuir informasaun katak antes nee haruka ba iha Konselhu Ministru maibe haruka fila fali mai, tanba sei hadia buat balu no too agora sira seidauk simu informasaun kona-ba ida nee.
Sublina, importante atu iha Estatutu Guarda Prizional, tanba Guarda balu servisu kleur maibe kontinua hela ho nivel dois, guarda balu neebe mate ho nivel dois, balu neebe pensium kontinua ho nivel dois, no iha Instituisaun sira seluk ema rejime jeral sai, no sira nian espesial hela ho nivel dois, durante tinan 25 ona.
(ter)
