DILI, STLTIMORLESTE.com – Estudantes husi eskola balun iha Munisipiu Likisa hahu uza ona uniforme nasional, maske balun mak seidauk uza.
Julio da Silva hanesan Diretor Servisu Edukasaun Munisipiu Likisa hatoo lia hirak nee ba jornalista STL liu husi telefone, Segunda nee (09/06/2025).
“Uniforme eskola mak halo, laos edukasaun, husi eskola garante deit nia uniformidade, maibe atu kontaktu ho kompanhia nee eskola mak hatene. Agora daudaun eskola balun uza ona, seidauk hatene eskola hira mak produs ona sira nian farda ba ita nian estudantes sira,” dehan nia.
Julio hatutan, estudantes nibel sekundariu iha Munisipiu Likisa balun mak hahu uza ona farda eskola, agora eskola hira mak uza ona nee, ninia dadus seidauk hatene, tanba presiza halo identifikasaun.
Iha fatin seluk, Sekretariu Estadu Ensinu Sekundariu Jeral no Ensinu Tekniku Vokasional, Domingos Lopes Lemos dehan, lei mos fo dalan atu sosializa ba inan aman sira kona-ba uniforme nasional nee, tanba nee mak profesor sira ba halo enkontru ho inan aman estudantes sira.
“Hau hanoin farda nee laos ita ba husu deit, nee iha eskola neebe deit ita sosa, farda nee iha pakote rua, ida ba desportu nian nee buat ketak ida nomos ida regularmente estudantes sira uza iha loron Segunda, Tersa no Kuarta nee buat ketak ida, farda iha oin rua maibe la taka dalan karik inan aman iha posibilidade farda ida regular ka ofisial ida uza nee bele iha rua para sira bele uza troka, nee depende ba inan aman sira nian konsiénsia rasik,” nia dehan.
Nunee mos Koordenadora Pre Eskolar Moris Foun I, Domingas Beatriz da Cunha hatete, kona-ba farda too agora estudantes sira seidauk uza, tanba nee loron-loron estudantes sira balun uza farda anterior no balun uza ropa baibain deit.
“Kona-ba farda eskola ami nian estudantes sira seidauk uza, nee duni balun mai sei uza farda anterior nian, maibe balun mak uza farda baibain deit,” tenik nia.
(jac)
