DILI, STLTIMORLESTE.com – Oras nee daudaun Eskola ESTV-IT 28 de Novembro Becora Díli presiza aumenta profesores espesialidade ba departamentu haat (4) neebe eziste iha eskola refere.
Haktuir Diretor Eskola ESTV-IT 28 de Novembro Becora Díli, Tomas Pinto ba STL iha nia knaar fatin, Segunda nee (08/06/2026).
“Nunee mos ami presiza ita nian profesores ba area produtivu ka profesores neebe mak iha area espesialidade hanesan eletronika, informatika, arte grafika no multi media nian, ba departamentu haat (4) nee mak ami sei presiza profesores nain 9 ou bele nain 12 tan, atu nunee hodi responde ba nesesidade estudante sira nian iha ami nian eskola,” nia informa.
Tomas dehan, eskola tekniku nee presiza aumenta profesores sira, tanba ida nee ba area produtivu nian, neebe mak ba oin tenke aumenta, liu-liu ba iha departamentu haat (4) neebe mak ohin mensiona nee.
Iha parte seluk, Manuel Verdial, nuudar Diretor Eskola Sekundariu Jeral 10 de Dezembro Comoro katak, eskola Sekundáriu Jeral 10 de Dezembro Comoro, too agora seidauk iha profesores ba disiplina lingua português.
“Hau seidauk halo karta legal, maibe ho hau nian aproximasaun informal ba iha diresaun edukasaun nasional ensinu sekundariu jeral, liu-liu profesores neebe hanorin lingua português, nee ami falta tebes, tanba profesores nain rua neebe tama reforma obrigatoriu, nee duni fatin ba profesores nain rua nee mak mamuk total,” nia afirma.
Nia dehan, se ida nee mak agora la hetan, sira sei buka meus oinsa bele haree labarik sira estajiadu haree ba sira nian kapasidade, sira bele ajuda disiplina ida nee, hodi bele asegura daudaun aula nee, hodi hein bolsa kandidatu neebe ba lingua português, hodi haree ba disiplina ida nee dadaun nee sei mamuk hela.
“Ba disiplina ida nee fatin sei mamuk, oinsa mak ho rekrutamentu bolsa kandidatu ninia nee bele tau fali profesores nain rua ba disiplina português ninia, ita labele haree fatin nee ninia karga orariu nee labele mamuk, maibe durante nee ami fahe profesores sira balun hanorin too 30 oras, balun 34,” katak nia.
(jac)
