DILI, STLTIMORLESTE.com — Diresaun Nasionál Transporte Terrestre (DNTT) mantein kobra taxa foun, hodi halo Estudante Universitáriu Timor Leste (EUTL) la konsege redús presu transporte nian, maske halo tiha konkordánsia iha Dekretu-Lei Númeru 17/2026.
Situasaun ne’e halo observador polítika, Samuel da Silva, konsidera katak konkordánsia ne’ebé EUTL sira hetan hodi redús taxa ne’e “la la’o tuir planu” tanba la fó mudansa ruma iha terenu no la iha kbiit legál atu hapara implementasaun regulamentu foun ne’e.
“Konkordánsia ne’ebé estudante sira atinje bele dehan la la’o tuir planu tanba iha terenu DNTT mantein nafatin kobra taxa foun tuir Dekretu-Lei 17/2026. Ida ne’e hatudu katak diálogu sira la muda desizaun polítiku-administrativu ne’ebé vigor ona,” dehan Samuel ba STL, iha Kaikoli, Dili, Tersa nee (25/08/2026).
Governu no DNTT tuir Samuel tenke hatudu transparénsia no komunikasaun ne’ebé momoos ba públiku, liu-liu ba estudante no komunidade sira ne’ebé sente todan ho aumentu taxa foun ne’e, atu nune’e labele kria konfuzaun iha sosiedade leet.
Iha parte seluk, Akademista husi Universidade Nasionál Timor Lorosa’e (UNTL), Eduardo Magno, kritika mós asaun DNTT nian ne’ebé kontinua kobra taxa foun ne’e, maske la iha konsensu kumpri iha terenu.
Nia subliña katak Governu no DNTT tenke foti desizaun ne’ebé ho baze no konsidera kbiit ekonomia sosiedade nian, liu-liu estudante no komunidade kbiit-laek sira.
“Polítika públika ne’ebé foti husi Governu tenke hare ba kbiit ekonomia populasaun nian. DNTT no Governu tenke loke espasu diálogu ne’ebé ho lian nakloke no ho transparénsia ho akademista no estudante sira atu nune’e labele kria instabilidade no konfusaun iha komunidade leet,” dehan Eduardo Magno.
Eduardo hatutan tan katak, DNTT la tenke foti desizaun mesak hodi ignora ezijénsia husi sosiedade sivil no estudante sira, nune’e labele hamate promosaun ba justisa sosiál iha rai laran.
Entretantu, tuir informasaun neebe STL asesu husi terenu hatudu katak servisu kobra ba taxa foun transporte nian la’o nafatin tuir tabela foun husi DNTT, maske antes ne’e iha pressaun barak husi li’ur atu hatún no kria fleksibilidade ba presu sira ne’e.
(car)
