KANADÁ, STLTIMORLESTE.com —Liu husi Komunikadu Impresa Media F-FDTL neebe STL asesu katak, Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek” partisipa iha Konferensia Anual Xefe Forsa Defeza Indo-Pasífiku (CHODs) ba dala-28. Eventu nee halao husi loron 31 Agostu too 2 Setembru 2026 iha Vitoria, Kanadá.
Iha Konferensia nee ho tema “Hametin Seguransa Koletiva, Navega Dezafiu sira iha Panorama Dinámika Indo-Pasífiku”. Ko-prezide husi Xefe Forsa Defeza Kanadá, Jenerál Jennie Carignan, no Komandante Komandu Indo-Pasífiku EUA, Almirante Samuel J. Paparo.
Forum neebe halao dezde 1998 nee halibur xefe forsa defeza, ofisiál superior no peritu seguransa husi nasaun sira iha rejiaun Indo-Pasífiku. Durante loron tolu, delegasaun sira diskute topiku sira hanesan intelijensia artifisial, lideransa no kooperasaun multilateral liu husi painel, workshop no enkontru bilateral.
Entretantu iha loron dahuluk, 31 Agostu, Jeneral Falur partisipa mos enkontru multilaterál Xefe Forsa Defeza ASEAN iha marjen konferénsia. Enkontru nee foka ba hametin koordenasaun no dialogu, liu-liu iha kontestu Timor-Leste nia prosesu ba adezaun plena ba ASEAN.
Iha loron 1 no 2 Setembru, delegasaun Timor-Leste halo enkontru bilateral ho omologu sira husi Singapura, Kamboja, Fiji no Brunei. Diskusaun foka ba hametin kooperasaun defeza, fahe esperiénsia operasional no aprofunda relasaun entre forsa armada sira.
Partisipasaun nee reafirma kompromisu Timor-Leste nian ba seguransa koletiva no kooperasaun rejionál, iha momentu neebe panorama jeopolítiku Indo-Pasífiku sai kompleksu liutan.
Enkuantu akompana Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek” iha misaun nee nia espoza, Rosa Maria Quintão, no Sargento-Mor Alberto Moreira Freitas “Jerry Mesak”.
(jen)
