BAUCAU, STLTIMORLESTE.com – Família entrega frater no diakonu hamutuk nain neen (6) ba Igreja Katólika liu husi Dioseze Baucau, atu kontinua sira nia dalan vokasaun no preparasaun ba ordenasaun diakonal no saserdotal.
Entrega ne’e realiza ho serimonia kultural husi kada Diakonu no Frater neebe família akompanha husi sira nia família entrega direta ba Bispu Dioseze Baucau, Dom Leandro Maria Alves, iha Igreja Paróquia Santo António Vila Antiga Baucau, Domingu (23/08/2026), ho família sira hato’o sira-nia apoiu ba oan sira ne’ebé hili dalan vokasaun atu serve Igreja Katólika.
Reprezentante família frater no diakonu sira, José Ricardo de Jesus Freitas, espresa sentimentu orgulhu ba oan, alin no maun sira ne’ebé Maromak hili ona atu sai bibi-atan Uma Kreda nian, hodi haklaken Maromak nia Evanjelhu ba sarani sira.
“Ami família tomak ofisialmente entrega ami-nia oan, maun no alin ba Uma Kreda, atu nune’e sira bele servi Nai Maromak nia liafuan no haklaken ba maluk sarani sira hotu,” hateten José Ricardo de Jesus Freitas ba jornalista sira iha Igreja Paróquia Santo António Vila Antiga Baucau.
Nia katak dalan ne’ebé frater no diakonu sira tuir la’ós tanba orientasaun husi família, maibé nu’udar vokasaun ne’ebé sira rasik hili no tuir, tanba konsidera katak Maromak mak hili sira atu haklaken nia Evanjelhu ba sarani sira.
Nia agradese no orgulhu, tanba Maromak hili sira nia oan atu sai bibi-atan Uma Kreda nian hodi servi sarani sira iha mundu, liuliu sarani sira iha Timor-Leste.
“Ami família só akompaña de’it ho orasaun, oinsá sira bele atinji sira-nia objetivu hanesan nai lulik iha Uma Kreda Katólika,” hateten José.
Iha fatin hanesan, Bispu Dioseze Baucau, Dom Leandro Maria Alves, hato’o nia orgulhu no agradesimentu ba família sira ne’ebé entrega ona sira-nia oan mane ba Igreja Katólika, liuhusi dalan vokasaun atu servi sarani no Uma Kreda Katólika.
“Ita haree família sira ida-idak mai kontente ho grasa vokasaun ne’ebé Maromak haraik. Ida-ne’e mak ita kontente hahi-hasa’e ba Nai Maromak. Ita hahi ba Nai Maromak tanba vokasaun ne’e Nai Maromak mak bolu husi família ida-idak ho família sira-nia kolaborasaun hodi entrega sira-nia oan ba Nai Maromak,” hateten Dom Leandro.
Dom Leandro mos hato’o obrigadu ba família Frater no Diakonu sira ne’ebé kolabora ho grasa Maromak nian, liuhusi entrega sira-nia oan mane atu serve Igreja Katólika.
Bispo Dioseze Baucau konsidera katak asaun ne’ebé família Frater no Diakonu sira halo ba oan sira-nia fatin sei la mamuk iha família nia leet, maibé sei troka husi prezensa Nai Jesus Kristu hamutuk ho sira-nia família.
“Inan-aman sira mai hotu-hotu kontente. Tanis karik tanis ida kontente nian, la’ós tanis tanba dehan oan sira laiha ona. Maibé tanis kontente nian, tanba entrega oan servisu ba Nai Maromak, hodi hatudu Nai Maromak nia domin ba ema sira seluk. Nee duni ita agradese, buat ne’ebé importante liu mak orasaun,” hateten Dom Leandro.
Lider másimu Dioseze Baucau husu ba família sira atu nafatin hasa’e orasaun ba Nai Maromak, atu sira-nia oan sai bibi-atan ne’ebé hakat metin tuir dalan Jesus Kristu no kontinua servi sarani no Maromak ho fidelidade.
Enkuantu, reprezentante kandidatu sira, Diakonu José Maria Ressurreição Fernandes de Jesus, SDB, espresa sentimentu kontente ho asaun família nian, tanba bele entrega ona sira ba Uma Kreda Katólika atu servi sarani sira tuir Jesus Kristu nia hanorin.
Entretantu, frater no diakonu nain neen ne’ebé família entrega mak Francisco Horta, SDB, husi Paróquia São José Operário Atsabe; Januário Araújo Carlos, husi Paróquia São Pedro no São Paulo Aileu; José Alves Soares, SDB, husi Paróquia Nossa Senhora do Carmo Letefoho; José Maria Ressurreição Fernandes de Jesus, SDB, husi Paróquia Santo António Baucau; Leandro Almeida, SDB, husi Paróquia Dom Bosco Laga; no Frater Fabiano Brito Fabrizio Sanches Goulart, husi Paróquia Santo António Baucau, neebe iha serimonia nee hetan partisipasaun masimu husi familia sira.
(tom)
