Familia Salezianu Hahu Prepara Selebra Festa Tinan 100

Padre Parokia Igreja Santo Antonio Vila Antiga, Manuel Ximenes da Silva, SDB. (Foto: STL/EST 2)

BAUKAU, STLTIMORLESTE.com – Familia Kongregasaun Salezianu Dom Bosco iha Timor Leste sei selebra tinan ba dala 100 iha tinan 2027.

Padre Parokia Igreja Santo Antonio Vila Antiga, Manuel Ximenes da Silva, SDB hatete, atu selebra festa Salesiano ba tinan 100 iha Timor-Leste, agradese ba Maromak, tanba Espiritu Santu liu husi São João Bosco hetan vokasaun harii kongregasaun iha Mundu neebe hahu iha tinan 1859 no dadaun halo ona ba tinan 160, nunee iha Timor sei selebra iha tinan 2027, tanna Misionariu husi São João Bosco too iha Timor liu husi primeira espedisaun iha tinan 1927.

“Agora ita atu selebra iha 2027, neebe iha tinan 2 balu nia laran ita iha preparasaun oinsa selebra tinan 100 nee ho diak, tanba nee sei lao ho familia Salesiana tomak,” hatete Padre Manuel ba jornalista sira, hafoin remata misa solene vizita ilhas São João Bosco, iha Eskola Ensinu Baziku sentral terseiru siklu Vila Nova, Kuarta (29/01/2025).

Padre nee sublina, selebrasaun festa tinan 100 sei konsentra husi familia Salezianu sira iha Timor Leste hamutuk grupu 6, kompostu familia SDB, FMA, Antiga Alunus, Koperador Salezianu, VDV inklui Adma.

Tanba durante ezistensia Kongresaun Salezianu too ohin loron buras ona iha Timor Leste, tanba inisu too ohin loron produs ona estudante barak iha nivel eskola Salesiano nian hanesan Fuiloru, Fatumaka, Laga, ESSA Baukau no seluk tan neebe dadaun barak asume pasta Governu no balun Padre no Madre.

Aliende mos Timoroan nain 200 sai ofisialmente Salezianu no nain 15 sai Misionariu iha Nasaun estranjeiru.

“Progresu nee ita tenke agradese ba Maromak, Uma Kreda no ba Dom Bosco nia espiritualidade neebe ita dehan katak too ohin loron buras liu iha ita nia rai neebe kontinua prepara labarik foinsae sira iha futuru,” hatete Padre Manuel.

Enkuantu Antigus Alunas Dom Saleziana, atual Prezidente Autoridade Munisipiu Baukau, Veneranda Lemos agradese ba prezensa Kongregasaun Salezianu Dom Bosco nian iha Timor, tanba bele forma rekursu umanu feto 1 neebe kontribui ona iha prosesu dezenvolvimentu hanesan Timoroan.

“Hau agradese tebes ba familia Salesiana, tanba hau bele hola parte iha familia boot Salesiana,” Veneranda argumenta.

Selebrasaun tinan 100 Kongregasaun Salezianu iha Timor Leste, Prezidente Autoridade Munisipiu Baukau nee fiar, sei iha mudansa ba jovem sira iha Baukau, tanba ilhas São João Bosco nuudar mahein ba Edukasaun Baukau, neebe sei transforma metalidade jovem estudante sira.

(EST 2)

Share it :

Leave a Reply

Your email address will not be published. Required fields are marked *