DILI, STLTIMORLESTE.com – FOKUPERS Timor husu ba ema hotu atu rejeita no kombate forma insultu, diskriminasaun, asediu seksual no violensia kontra feto hotu-hotu, inklui akontese iha midia sosial. Feto hotu-hotu iha direitu atu moris ho seguru, respeitu no ho dignidade.
Liu husi komunikadu neebe STL asesu husi media FOKUPERS, Kinta nee (23/07/2026) hatete, feto laos alvu ba insultu sira. Feto laos objetu ba asediu no feto laos alvu ba intimidasaun. Feto hotu-hotu iha direitu atu moris ho seguru, respeitu no ho dignidade.
FOKUPERS husu ba ema hotu atu rejeita no kombate forma insultu, diskriminasaun, asediu seksual no violensia kontra feto hotu-hotu, inklui akontese iha midia sosial.
Komunikadu nee haktuir, lideransa lo-loos laos determina husi pozisaun ka poder. Lideransa lo-loos hatudu liu husi integridade, responsabilidade, no respeitu ba dignidade umana. Respeita feto nuudar sinal lider neebe dignu no merese povu fo nia konfiansa.
Basa too ona tempu atu hakotu kultura silensiu, atu hamriik hamutuk ho vítima sira no tempu ona atu uza midia sosial hodi habelar respeitu, laos odiu. Atu harii solidariedade, laos bullying.
FOKUPERS haktuir, keta nonok wainhira haree injustisa. Labele sai parte ba insultu no asediu. Uza imi nia lian hodi defende direitus humanus.
“Lian ida, asaun ida, hamutuk ita kombate bullying, hamutuk ita hakotu diskriminasaun, hamutuk ita harii sosiedade ida neebe respeita feto no tane aas dignidade umana,” haktuir komunikadu nee.
Respeita feto, hapara asediu seksual no hapara bullying.
Relasiona ho publikasaun antes, ami husu deskulpa.
(dom)
