DILI, STLTIMORLESTE.com – Eskola Sekundariu Jeral FINANTIL selebra aniversariu ba dala XXV ho misa agradesimentu, neebe prezide husi Padre Helio Castro Alves CMF.
Haktuir Diretor Eskola Sekundariu Jeral FINANTIL, Aniceto Berlelo ba jornalista sira iha ESJ FINANTIL Aimutin, Kinta nee (05/06/2025).
“Ohin Eskola FINANTIL marka tan istoria ida, eskola halo aniversariu ba dala XXV, kontente tanba ho siensia neebe mak ami iha bele fahe ba ita nian estudantes sira, tanba nee mak ohin loron 5 Junhu 2025, Eskola FINANTIL halo tinan XXV, iha mos ami nian alumi neebe ohin ami konvida mai partisipa iha aniversariu ida nee, tanba alumi husi eskola ida nee agora daudaun asumi kargu hanesan Sekretariu Estadu Pekuaria,” tenik nia.
Nia dehan, iha tinan ida nee FINANTIL Selebra Aniversariu ba dala XXV, ho nia tema “Kbiit mak ho Nia Matenek”, tanba nee esforsu neebe mak FINANTIL iha mak oinsa atu hadia kualidade estudantes ba futuru ho diak liu tan.
“Ikus hau nian mensajen ikus ba povu ida nee nia oan neebe mak mai eskola iha nee, fiar mai ami profesores, tanba realidade hatudu katak estudantes alumi husi eskola ida nee balun sai membru governu, balun sai amu, ami hein katak iha aniversariu ida nee ba oin ita boot sira bele mai halo diskusaun ho eskola, ohin ita selebra aniversariu ida nee ho misa agradesimentu,” nia afirma.
Tuir observadaun STL iha terenu Kinta nee katak, partisipa iha aniversariu Eskola Sekundariu FINANTIL nee husi membru governu balun, konandante PNTL, reprezentante husi Ministeriu Edukasaun, profesores no estudantes husi eskola refere.
(jac)
