FM Konsidera Kontrolu Operasional Arma-Guerra Laiha Seriedade

Jornalista STL entrevista hela Diretor Ezekutivu, Fundasaun Mahein (FM), Nelson Carvalho. (Foto: Media FM)

DILI, STLTIMORLESTE.com – Fundasaun Mahein (FM) konsidera kontrolu operasional ba Arma-Guerra iha Timor Leste (TL) seidauk iha seriedade, tanba nee Governu presiza iha seguransa masimu no kontrolu dignu ba arma nasaun nian.

“Ita haree parte seguransa liu-liu Servisu intelijensia sira, Polisia Sientifika Investigasaun Kriminal (PSIK) no Polisia Nasional Servisu Investigasaun Kriminal (PNSIK) tenke halo kontrolu masimu operasional Arma-Guerra sira iha Timor Leste, tanba realidade ema uza arma branka hodi halo paniku tebes ba publiku,” dehan Diretor Ezekutivu husi FM, Nelson Carvalho ba STL iha nia knaar fatin, Bairo dos Grilhos, Dili, Segunda (27/01/2025).

Diretor nee hatutan, Governu Timor Leste liu husi parte seguransa Nasional Intelizensia (SNI), PSIK, PNSIK tenke asegura asaun neebe sai problema boot iha Timor Leste, hanesan uza kilat hodi tiru eis Prezidente Republika, Fransisco Guterres Lu’Olo nia rezidensia, foin daudaun tiru tan karreta hilux ida iha armazen lisun Aimutin nian, insidente ida nee husi parte operasional ba arma-guerra mak seidauk tau seriedade atu asegura masimu.

Tanba nee husi parte relevante sira presiza halo kampanha, sosializa informasaun ba povu emteritoriu nasional, arma-guerra, bala musan nee lei fo mandatu ba parte seguransa hanesan PNTL no F-FDTL atu lori hodi defende Timor Leste.

Signifika katak arma-guerra nee ema seguransa sira mak uza, oinsa bele halo kontrolu, maibe haree katak kontrolu operasional mak seidauk tau seriedade, oinsa atu kontrola didiak ba arma-guerra sira, nunee bele uza kilat tuir lei haruka.

Iha parte seluk, Estudante Universidade da Paz (UNPAZ) Departamentu Diretu Jeral, Octavio Hornai Pinto katak, parte seguransa sira, liu-liu Servisu Nasional Intelijensia (SNI), Polisia Sientifika Investigasaun Kriminal (PSIK), Polisia Nasional Servisu Investigasaun Kriminal (PNSIK) tenke halo kontrolu.

Tanba autor ka ema deskonhesidu neebe mak uza arma branka hodi tiru rezidensia eis PR, Lu’Olo nian, uza mos arma branka hodi tiru karreta, tanba lei hatene katak PNTL no F-FDTL mak iha kompetensia tomak atu lori kilat, hodi asegura destinu povu Timoroan no nasaun Timor Leste.

Governu liu-liu parte Ministeriu Defeza nian tenke tau lei ida neebe atu asegura arma branka sira, neebe ema deskonhesidu sira uza, hodi ameasa ema iha sosiedade, nee krime no viola diretus umanus, nunee parte relevante sira, SNI, PSIK, PNSIK tenke asegura, lori aktu krime ida nee tuur lei haruka.

Entretantu Ativista Diretu Umanu, Onorio Fereira Fernandes hatete, arma branka sira neebe durante ema sivil ka deskonhesidu sira uza hodi amesa ema iha sosiedade, insidensia ida nee husi parte SNI, PSIK, PNSIK tenke halo kontrolu operasional masimu no rigor.

Tanba servisu intelijensia nee parte ida atu asegura masimu ba ema neebe mak hakarak destroi destinu nasaun ka povu nian, sira mak tenke hatene uluk, oinsa halo prosesu ba Prokurador, Ministeriu Publiku no Tribunal Rekursu, atu halao nia papel tuir lei haruka.

(EST 1)

Share it :

Leave a Reply

Your email address will not be published. Required fields are marked *