BAUCAU, STLTIMORLESTE.com – Fulan lima ona, Governu liu husi Sekretariu Estadu Protesaun Sivil la selu osan ransu ba Membru Korpu Bombeiros sira iha Munisípiu Baucau.
Liu husi Konferensia Imprensa, Porta-voz Corpo Bombeiros Munisípiu Baucau, Casemiro de Oliveira das Neves, alerta ba Ministériu Interior, Sekretáriu Estadu Protesaun Sivil, Parlamentu Nasional no Komisaun Anti Korupsaun (CAC) atu haree no fiskaliza asuntu osan ransu membru korpu bombeiros iha territóriu nasional, tanba membru korpu bombeiros hein ona durante fulan ha’at to’o fulan lima osan ransu nian ne’ebe promete seidauk to’o iha membru korpu Bombeirus sira nia liman atu uza ba nesesidade servisu nian iha terrenu.
“Ami Bombeiros Timor Leste durante fulan ha’at atu ba fulan lima ona osan ne’ebé ami atu hodi sustenta família uma laran nian. Maibé ami tenke uza ka gasta fila-fali iha Korpu Bombeiros ida-idak hodi atende servisu emergência ne’ebé afeta ba komunidade. Maibé to’o agora, tuir ami nia observasaun, Prezidente Autoridade Proteção Civil ho nia estrutura tomak laiha espírito de vontade hodi trata ami nia asuntu osan ransu ida-ne’e ho lalais,” Casemiro hatete liu husi Konferensia Imprensa ne’ebé realiza iha edifísiu Korpu Bombeirus Baucau, Tersa (25/08/2026).
Nia husu ba na’in ulun sira kompetente ne’ebé temi ona atu husu diretamente ba Prezidente Autoridade Proteção Civil kona-ba prosesu osan ransu ne’e no bainhira bele rezolve.
Iha fatin hanesan, membru Korpu Bombeiros Munisípiu Baucau, José Francisco da Costa, sublina, osan ransu ne’ebé Sekretáriu Estadu Protesaun Sivil liuhusi Prezidente Autoridade Protesaun Sivil inisia ba membru korpu bombeiros iha territóriu nasional mak US$80 kada membru kada fulan.
Tuir José, osan ne’e planeadu atu hahú simu iha inísiu fulan Maiu 2026, maibé to’o fulan Agostu, osan refere seidauk simu husi membru Bombeiros Munisípiu Baucau.
“Ami sente la dun diak, liu-liu Prezidente Autoridade ho nia estrutura tomak ne’e laiha espíritu de vontade atu rezolve ami nia problema. Tanba ne’e mak ami halo konferénsia imprensa ida-ne’e atu loke mos ami nia na’in ulun sira nia hanoin atu bele rezolve ami nia asuntu ida-ne’e,” José hatete.
Nia konta katak, antes fulan Maiu 2026, membru Bombeiros Munisípiu Baucau hetan hahán meiudia no kalan husi kompanhia fornecedora Brotar de Agua, ne’ebé tuir nia deklarasaun, kontrata liuhusi Sekretáriu Estadu Protesaun Sivil no Autoridade Protesaun Sivil.
Maibé, iha inísiu fulan Maiu, kompanhia refere hapara ona fornese hahán, ho razaun katak osan ransu sei aloka kada fulan ba membru bombeiros sira, maibe to’o ona fulan Agostu osan ransu refere seidauk simu husi membru korpu bombeiros iha Munisípiu Baucau.
“Agora osan ransu laiha, kompanhia tein mos laiha. Ami ida-idak tau osan hamutuk sosa foos no rice cooker hodi tein iha ne’e, hodi aumenta servisu 24 oras,” nia hatete.
Bombeiros sira husu ba autoridade kompetente atu fó klarifikasaun kona-ba prosesu pagamentu no rezolve lalais osan ransu ne’ebé konsidera importante atu sustenta aan hodi fo apoiu ba komunidade sira iha tempu emerjensia.
Entretantu, membru Korpu Bombeiros iha Munisípiu Baucau hamutuk nain 26.
(tom)
