DILI, STLTIMORLESTE.com – Fundadora Fundasaun Alola, Kirsty Sword Gusmão apoia Organizasaun Naun Governamentál (ONG) Saúde Ba Ema Hotu (SABEH) ho karreta ida atu fasilita organizasaun ne’e hala’o atividade kuidadu saúde bá komunidade iha área rurál no remota.
Informasaun neebe STL asesu husi Palasiu Governu, Segunda (24/08/2026) katak, karreta ne’e entrega diretamente husi Kirsty Sword Gusmão no simu husi Diretór Ezekutivu SABEH, Andrezinho Belo, iha rezidénsia Lecidere, Dili.
Kirsty Sword Gusmão deside apoia SABEH, tanba konsidera servisu organizasaun ne’e importante, liu-liu iha área remota sira ne’ebé komunidade enfrenta difikuldade asesu ba servisu saúde tanba distánsia dook hosi postu saúde.
“Ha’u rona kona-bá servisu ne’ebé Dr. Andre halo hamutuk ho ninia organizasaun naun governamentál SABEH, ne’ebé fornese servisu saúde bá povu iha área remota sira. Tanba ha’u mós servisu iha Fundasaun Alola ne’ebé haree saúde hanesan área importante, ha’u hanoin atu ajuda hodi fasilita sira-nia servisu,” nia esplika.
Kirsty Sword Gusmão mós hato’o agradese ba na’in Kompañia Bandido Qualidade, Sr. Marito, ne’ebé responde pozitivu bá ninia pedidu atu fornese karreta ida ba SABEH.
“Nia osan la barak, maibé riku liu mak ha’u iha belun barak. Tanba ne’e, ha’u konsege husu ajuda ba Marito atu bele fornese kareta ida hodi ajuda Dr. Andre no voluntáriu sira hala’o servisu,” nia hateten.
Iha parte seluk, Diretór Ezekutivu SABEH, Andrezinho Belo hato’o agradese ba Kirsty Sword Gusmão, tanba apoia transporte ne’e bele fasilita servisu organizasaun nian ba komunidade iha área remota.
“Ha’u labele deskreve ha’u-nia kontente, maibé ha’u agradese tebes tanba mana Kirsty bele haree saida mak SABEH presiza no saida mak komunidade presiza. Apoiu ne’ebé nia fó sei fasilita ami-nia servisu ba komunidade iha área remota,” Andrezinho Belo hateten.
Andrezinho hateten katak, SABEH kontinua hala’o servisu saúde ba komunidade, liu-liu ba ema sira ne’ebé enfrenta difikuldade asesu ba tratamentu tanba kondisaun saúde, falta transporte no distánsia dook husi fasilidade saúde.
SABEH hala’o mós programa saúde eskolar, ne’ebé involve médiku, parteira no enfermeiru voluntáriu sira atu hala’o rastreiu (screening) iha eskola sira, hodi identifika problema saúde estudante sira nian no buka resposta apropriada.
Programa seluk mak kuidadu paliativu komunidade, ne’ebé foka ba tau-matan ba ema ho moras króniku, inklui moras kánkru.
Kuidadu ne’e la haree de’it aspetu fíziku, maibé mós aspetu psikolojiku, sosiál no espirituál husi pasiente sira.
Andrezinho hateten katak apoiu transporte ne’e sei permite SABEH aumenta atividade sira tanba durante ne’e organizasaun enfrenta limitasaun transporte.
“Ho apoia transporte ne’e, ami bele hala’o atividade barak liután, tanba durante ne’e ami hasoru difikuldade iha transporte. Voluntáriu SABEH hamutuk na’in 64 uza transporte ida de’it ba fatin sira,” nia haktuir.
Tuir Andrezinho, SABEH sei servisu hamutuk ho Fundasaun Alola no Halibur Ema Moras Kánkru (HALIKU) atu tau-matan ba inan sira ne’ebé sofre moras kánkru mama, ho prinsipiu dignidade, justisa no kompaixaun.
(jos)
