BAUKAU, STLTIMORLESTE.com – Fundasaun Sentru Feto Haburas Dezenvolvimentu (CFHD) avalia grupu benefisiariu sira, neebe implementa projetu husi Gabinete Apoiu Sosiedade Sivil (GASS), iha Munisipiu Baukau.
Diretora Fundasaun CFHD, Tereza Perreira esplika, projetu refere implementa husi grupu benefisiariu sira iha Postu Baukau Vila husi Suku Kaibada, Suku Kaikua, Postu Vemasi, inklui iha Postu Venilale Suku Uatulia no UatuHako, neebe prioridade ba transforma produtu lokal ba produtu modernu, hanesan sukaer rebusadu, hortikultura, pekuaria no seluk tan.
“Objetivu ohin ita halo atividade reflesaun no avaliasaun ida nee ba projetu GAS nian neebe projetu neebe hahu husi fulan Maiu too mai Dezembru nee, fulan 8 remata ona entaun ami halo avaliasaun,” hateten Tereza ba jornalista sira, iha Vila Nova, Tersa (10/12/2024).
Maibe nia dehan, susesu husi grupu benefisiariu sira mak konsege transforma ona produtu lokal ba produtu modernu neebe, liu liu produsaun rebusadu sukaer nian asesu ona merkadu husi lokal too nasional, nomos atividade seluk hanesan hakiak manu no kuda modo no seluk tan, mos asesu ona iha merkadu.
Tanba durante fulan 8 grupu benefisiariu implementa projetu ho diak no laiha difikuldade, tanba hetan apoiu husi GASS neebe jere husi CFHD hodi fasilita treinamantu no apoiu ekipamentus ba grupu benefisiariu refere.
Iha fatin hanesan, Xefe Grupu Halibur Malu Buka Moris Rasik, husi Postu Venilale, Jorge Alcino Guterres mos informa, grupu refere harii iha tinan 2017 neebe foku ba atividade 3 mak hanesan, rai osan hodi fo empresta ba ema, hortikultura nomos hakiak manu lokal, neebe involve husi ema nian 18 kompostu feto mane.
“Kona-ba apoiu neebe CFHD fo ami sente orgulhu, tanba bele fasilita ami hodi hasae liu tan ami nia produsaun oinsa bele lori ba merkadu,” nia sublina.
(EST 2)
