DILI, STLTIMORLESTE.com – IX Governu Konstitusional sei kompleta tinan 3 nia mandatu iha fulan julhu tinan nee. Maski Governu fo sai progresu iha projetu sira, maibe publiku no akademiku sira foka liu ba realidade triste neebe kontinua aat ba beibeik, labarik sira seidauk iha kadeira hodi tur iha rai kuandu estuda, povu moras iha area rural tenke hulan deit tanba ambulansia laiha, no estrada iha area remotas sira nakonu ho tahu dodok.
Akademiku UNPAZ, Deolindo Vieira Martins observa katak, esforsu Governu nian iha setor edukasaun seidauk too iha kualidade ensinu neebe diak. Tanba fasilidade baziku sira seidauk sufsiente. Deolindo fo hanoin katak, kondisaun edifisiu eskola neebe aat, falta kadeira ho meza, no menus livru ba estudante sira sai obstaklu boot ba prosesu aprendizajen iha eskola.
“Kualidade edukasaun mak investimentu potensial ba futuru, maibe buat neebe ita haree agora edifisiu eskola neebe aat, falta kadeira, meza no livru hanesan hamate duni mehi ka esperansa no futuru ba estudante sira,”dehan Deolindo ba STL, Kuarta nee (03/06/2026).
Iha tempu hanesan Akademiku nee mos kritika makas iha setor Saude neebe sei hasoru dezafiu boot. Nia relata katak Pasiente sira kontinua hasoru difikuldade tanba aimoruk neebe menus, povu kiik sira iha area rural neebe moras tenke hulan deit tanba ambulansia laiha, no atendimentu ba Pasiente sira neebe seidauk koresponde ho padraun kualidade neebe diak.
“Modernizasaun ekipamentu mediku mak buat diak ida, maibe nee hanesan tau sasan iha fatin neebe la folin, se aimoruk laiha, ambulansia la funsiona hodi tula povu kiik iha area rural neebe moras no atendimentu ba Pasiente sira sei ladiak, entaun progresu iha setor Saude nee sei sai dezafiu ida neebe todan tebes,”dehan nia.
Ba setor infraestrutura Akademiku nee lamenta tebes tanba estrada iha area remotas sira kontinua husik hela iha kondisaun neebe aat tebes, liu liu bainhira tempu udan. Nia konsideira katak kualidade konstrusaun neebe fraku nuudar prejuizu boot ba Estadu nia osan no fo susar ba povu nia mobilidade.
“Infraestrutura neebe harii la ho kualidade neebe diak, nuudar deit gastu saugati ba konfre Estadu nian, tanba estrada iha area remotas sira nakonu ho tahu dodok neebe taka dalan ba povu nia atividade loron loron,” hatete Akademista nee.
Entretantu antes nee Primeiru Ministru (PM), Kay Rala Xanana Gusmao hatete, Governu sei reativa mekanizmu fiskalizasaun neebe eskritu liutan iha setor tolu nee. Iha setor Edukasaun Governu planeia hatutan programa reabilitasaun edifisiu eskola no distribuisaun kadeira meza, no livru ba eskola sira iha nivel Munisipiu. Iha setor Saude Governu sei foka liu ba jestaun stok aimoruk, reabilitasaun no distribuisaun ambulansia ba Sentru Saude sira iha Munisipiu, no melhora atendimentu mediku liuhusi formasaun kontinuadade ba profesional Saude sira. Entretantu ba setor estrada neebe aat ba bebeik, Governu sei implementa regra foun ida ba kompanhia sira neebe manan tender, hodi garante katak kualidade konstrusaun tenke tuir padraun internasional, atu evita prejuizu ba orsamentu Estadu nian.
(car)
