DILI, STLTIMORLESTE.com – Governu presiza aloka Orsamentu Jeral Estadu (OJE) 2025 barak ba iha setor Edukasaun, Saude no Agrikultura, atu nunee povu bele hetan benefisiu.
Prezidente Konselhu Diretoria Rede Feto Timor Leste, Zelia Fernandes hatete, povu sei preokupa kona-ba irigasaun, inklui sala de aula menus nomos aimoruk laiha, tanba nee mak husu ba Governu diak liu tau osan barak ba setor tolu nee.
“Husu atu tau atensaun makaas ba setor edukasaun, saude no agrikultura, nunee bele sosa kadeira meza no aumenta aula no sosa aimoruk nomos hadia irigasaun sira neebe mak aat, nunee bele hasae produsaun ai-haan iha laran, bele redus hahan importasaun husi rai liur,” dehan Zelia ba ST iha nia knaar fatin Kaikoli, Dili, Segunda (06/01/2025).
Nia dehan, presiza iha balansu ho politika fiskal neebe Governu iha para oinsa halo balansu ba preokupasaun hotu pelumenus bele rezolve ba iha preokupasaun neebe mak komunidade iha, ezemplu iha area edukasaun maioria edefisiu neebe iha munisipiu barak husi Indonezia nia tempu tinan barak ona seidauk reablita, balu halo tan edifisiu, maibe sala rua ou tolu deit, la liu husi ida nee, sala de aula nee kontinua menus, saida mak politika fiskal tenke responde tau osan hodi hadia kestaun sira nee hotu, meza kadeira sei menus, tau osan para responde ba meza kadeira, labele tinan bailoron mak hakilar hela deit meza kadeira sala de aula menus.
Iha parte ketak, Akademista Husi UNTL, Judite Dias Ximenes hatutan, Governu presiza hasae osan iha area ekonomia no loke mos kampu servisu iha rai laran, nunee bele fo servisu ba Timoroan sira nunee trava sira sai ba rai liur.
Nia dehan, orsamentu nee diak liu tau prioridade nee ba iha setor edukasaun, tanba kualidade edukasaun nee defende ba profesores.
Entretantu Primeiru Ministru, Kay Rala Xanana Gusmão hatete, ba tinan 2025 sei kontinua hadia sistema finansas no aprovizionamentu iha ministeriu hotu- hotu, hodi kumpri regras finanseiru nian hodi hafasil ezekusaun no kontrolu orsamentu estadu nian liga pagamentu ba projetu estadu nian no seluk tan.
(eme)
