DILI, STLTIMORLESTE.com – Ministru Planeamentu no Investimentu Estratejiku (MPIE), Gastao Sousa hatete, Governu sei apoiu rekezitu balun ba projetu Pelican Paradise.
MPIE Gastao Sousa hatoo kestaun nee ba jornalista sira bainhira remata hasoru malu ho Prezidente Republika Jose Ramos Horta iha palasiu Prezidensial Nikolao Lobato, Bairo Pite, Kuarta (04/06/2025).
“Pelican Paradise ita haree tinan ida nee iha kuadru Governu projetu nee investimentu lao ona too agora seidauk iha atividade balun iha neeba, maibe sei iha diskusaun entre ami liu-liu hau, Ministeriu Planeamentu, MECAE ho Finansas haree didiak oinsa sira iha rekezitus balun neebe Governu presiza ajuda, tanba nee mak sei haree hela,” dehan Ministru.
Antes nee kompanhia neebe kaer projetu fitun liman preokupa ho bee no eletrisidade, oinsa Governu nia haree, hatan ba kestaun nee Ministru hatete Governu fo ona.
“Bee ho eletrisidade governu fo ona, ami prontu atu fo, hanoin iha fatin ona karik ita boot ba cek took iha neeba,” dehan Ministru.
Antes nee Prezidente Republika Jose Ramos Horta mos deklara katak la garantia projetu Pelican Paradise nee atu kontinua tanba lao kleur ona, hatan ba kestaun nee ministru hatete, se lao kleur haree mos kontratu uluk.
“Se lao kleur tenke haree mos kontratu neebe uluk selebra, hanoin iha nee Ministru Justisa mak hatene diak liu, maibe agora ami iha koordenasaun neebe diak tebes kona-ba aluga rai nia iha grupu interministerial nivel ministru neebe ami haree asuntu ida nee ho klean para haree didiak sei nafatin ka iha investidor seluk, diak liu hakarak investe sei haree ho asuntu ida nee,” katak nia.
Husi grupu interministerial sei haree didiak assuntu nee ho klean, nunee haree iha investidor ida nee mak sei iha investor seluk diak liu mak hakarak investe.
Iha grupu interministerial mak hanesan Ministru Justisa, Sekretariu Terras Propriedade, Ministra Finansas, Obras Publiku, Rransporte no Telekomunikasaun ho planeamentu hotu hotu tenke lao hamutuk.
Antes nee Prezidente Republika Jose Ramos Horta hatete, kompanhia Pelican Paradise neebe mak atu harii Otel Fitun-Liman iha Suku Tibar, Postu Administrativu Bazartete, Munisípiu Likisa la lao tanba governu mak demora, tanba la halo nia parte hodi dada eletrisidade no bee ba iha fatin refere.
Prezidente Republika hateten, projetu Pelican Paradise la lao tanba problema governu mak demora nee mak projetu Pelican Paradise la lao nee. Kompanhia sira kleur ona husu ba governu buat rua, tuir kontratu ho governu mak atu dada eletrisidade no bee ba iha fatin konstrusaun nee.
“Iha mundu no iha rai hotu-hotu nunee, governu responsabiliza ba infraestrutura neebe presiza ba fatin no projeitu sira nee. Rai iha tiha ona, Eletrisidade no bee laiha,” katak PR Horta.
(eme)
