DILI, STLTIMORLESTE.com — Akademista sira husu ba Governu atu foku reforsa fasilidade servisu no kapasita rekursu umanu ba Polisia Nasional Timor Leste (PNTL) no FALINTIL-Forsas Defeza Timor Leste (F-FDTL), hodi kombate atividade peska ilegal iha Tasi Timor.
Apelu nee hatoo hodi responde ba preokupasaun husi bankada Parlamentar Kongressu Nasional Rekonstrusaun Timorense (CNRT) no Frente Revolusionaria de Timor Leste Independente
(FRETILIN).
Akademista UNTL, Silveiro de Carvalho hatete katak, pedidu neebe bankada rua nee hatoo substansial tebes, tanba Tasi Timor nia riku- soin liu-liu iha setor peskas daudaun nee kontinua sai alvu ba esploitasaun ilegal husi parte estranjeiru.
“Atividade peska ilegal neebe akontese beibeik iha ita nia tasi laran labele husik deit. Nee ameasa boot ba soberania maritima no mos perdas finanseiras ba Estadu nia ekonomia,” tenik akademista nee ba STL sira, Tersa nee (28/072028).
Nia sublina katak, maski PNTL no F-FDTL iha ona mandatu atu asegura seguransa no soberania, maibe sira nia kbiit operasional sei fraku iha termus lojístika no teknika. Problema prinsipal mak hanesan falta roo patrulhamentu neebe modernu, ekipamentu komunikasaun avansadu, no treinamentu espesial ba forsas navais no maritimas.
Husi perspetiva akademika, Silveiro sujere ba Governu liu husi Ministeriu Defeza no Ministeriu Interior tenke tau orsamentu neebe sufisiente iha Orsamentu Jeral Estadu (OJE), hodi investe iha modernizasaun fasilidade seguransa marítima.
“Se ita hakarak proteje ita nia tasi no asegura katak ita nia riku soin tasi laran lori benefísiu ba povu no Estadu Timor Leste, laiha dalan seluk mak Governu tenke tau atensaun seriu hodi ekipamentu sufisiente no kria rekursu umanu neebe iha kapasidade diak hodi halo patrulhamentu rutina iha Tasi Timor,” dehan nia.
Iha parte seluk, Observador Politika, Delfin Soares mos fo sai nia hanoin katak, kestaun seguransa marítima no protesaun ba Tasi Timor labele haree deit nuudar asuntu konstant husi instituisaun seguransa, maibe tenke sai prioridade nasional neebe merese atensaun urjente husi poder ezekutivu no lejislativu, atu nunee labele husik Timor Leste nia riku soin labele lakon monu ba atividade peska ilegal neebe kontinua akontese daudaun.
Entretantu Xefe Bankada Kongressu Nasional Rekunstrusaun Timor (CNRT), Deputadu Patrocino Fernandes hateten, faktus ida hatudu katak instituisaun estadu nian neebe servisu iha area atu proteje Tasi, no rai maran sira nee funsiona hela halo vizilansia makaas.
(car)
