Grigorio: Hau Rezigna Aan Tanba Irregularidade

Prezidente Autoridade Munisipiu Dili (PAMD), Grigorio Saldanha "Mauris" sai husi nia kargu tanba la satisfas ho aktu irregularidade sira, neebe akontese iha nia mandatu durante nee. (Foto: STL/EST 1)

DILI, STLTIMORLESTE.com – Relasiona ho karta rezignasaun husi Prezidente Autoridade Munisipiu Dili (PAMD), Grigorio Saldanha “Mauris” sai husi nia kargu nee todan, maibe tenke foti no husik, tanba ho situasaun irregularidade neebe la ho dignu.

Haktuir Grigorio Saldanha “Mauris” hafoin sai husi nia kargu PAM Dili iha Kaikoli, Tersa (28/01/2025).

“Hau fo sai hau nia rezignasaun ba kargu PAM Dili, sente desizaun nee todan tebes, maibe ho fuan tomak, hau tenke foti, tanba situasaun irregularidade sira neebe hau sente laiha satisfasaun ba hau nia kompetensia,” dehan Grigorio Saldanha.

Tuir Grigorio katak, situasaun irregularidade administrativu no finanseiru durante mandatu ida nee hasoru irregularidade grave, liu-liu iha prosesu administrativu, inklui falsifikasaun dokumentu no prosesu sira neebe duviduzu tebes ba sosiedade.

Preokupa liu mak situasaun iha servisu rekolha lixu manual, neebe identifika tinan 1 halakon osan estadu maizumenus milhaun US$ 1, ho dadus sira nee fasilita husi relatoriu sira, rejistu husi sistema automatiku Tibar nian no evidensia fotografiku no videografiku husi fulan Agostu 2023 too Agostu 2024.

Tanba foin loron hirak liu ba SEATOU konfirma rasik, bainhira halo verifikasaun surpreza ba kamioneta tula lixu nian sira, sente katak situasaun nee la kondis ho kompetensia PAMD nian, maibe husu nafatin atu iha komitmentu neebe diak, hodi salva povu ba moris ho dezenvolvimentu.

Nia dehan, falta autonomia administrativu, dependensia demais AMD ba Ministériu Administrasaun Estatal (MAE), estraga kapasidade atu prepara didiak desentralizasaun poder lokal, tuir politika IX Governu nian.

Tanba nee konsidera katak irregularidade sira nee sai obstakulu ba realizasaun auditoria, iha fulan Setembru 2024, nunee husu ba Governu liu husi Ministru Administrasaun Estatal atu halo auditoria ba servisu AMD nian, maibe auditoria nee foin hahu iha Dezembru no too agora seidauk simu informasaun ruma kona-ba ninia rezultadu.

Aleinde nee hanesan figura rezistensia, João Shoque hatete, desizaun neebe Grigorio Saldanha foti, tanba ho prinsipiu hakarak defende povu, servisu ho buat neebe los, tanba lakohi atu sai fali seguransa ba ema, nee la diak.

Tanba nee hanesan jerasaun rezistensia sira, sente apresia tebes ba desizaun rezigna aan ida nee, tanba hatene katak kompetensia ema nian, nee ema nia servisu, no buat neebe justisa nee lia loos, lakohi atu lori fali nia povu ba injustisa.

“Ami nia apoiu malu nee mosu husi situasaun rezistensia kedas, katak buat neebe la diak nee injustisa hodi hamate povu, buat neebe diak nee mak justisa atu hamoris povu ba iha dezenvolvimentu nasional, tanba nee desizaun rezignaan ida nee konkorda tebes,” nia hateten.

(EST 1)

Share it :

Leave a Reply

Your email address will not be published. Required fields are marked *