DILI, STLTIMORLESTE.com – Hospital Nasionál Guido Valadares (HNGV) ezekuta ona 71% hosi Orsamentu Jerál Estadu (OJE) 2026, durante Janeiru to’o Setembru.
Diretora Administrasaun, Finansas, Logístika no Aprovizionamentu HNGV, Silvina Izina A. Ximenes Belo, hateten katak orsamentu HNGV ba 2026 hamutuk US$ 20.860.963.
Nia esplika katak, ezekusaun orsamentu ne’e kompostu hosi gastu atual 46%, komitmentu 18% no obrigasaun 7%, ne’ebé hamutuk atinji 71% durante fulan sia primeiru iha tinan 2026.
Orsamentu HNGV ba 2026 fahe ba kategoria haat, inklui saláriu no vensimentu US$ 12.136.963, bens no servisu US$ 4.110.284, kapital menór US$ 4.350.000 no kapital dezenvolvimentu US$ 263.400.
Bazeia ba dadus ne’ebé aprezenta, ezekusaun saláriu no vensimentu atinji 57%, enkuantu bens no servisu atinji 92%, inklui gastu atual, obrigasaun no komitmentu.
Iha kategoria kapital menór, ezekusaun atinji 97%, ho gastu atual 11%, obrigasaun 7% no komitmentu 69%, tuir esplikasaun hosi diretora ne’e.
Ba kapital dezenvolvimentu, nia mensiona ezekusaun hamutuk 97%, ho gastu atual 5%, obrigasaun 55% no komitmentu 37%.
“Gastu atual hatudu pagamentu ne’ebé remata ona, obrigasaun iha prosesu pagamentu, no komitmentu iha prosesu aprovizionamentu,” dehan Nia ba jornalista iha HNGV Bidau, Sesta (23/10/2026).
Silvina hateten katak, prosesu obrigasaun no komitmentu sei lao hela. Nia hein katak ezekusaun sira ne’e sei remata iha tinan ida ne’e nia laran.
Entretantu, ba OJE 2027, HNGV propoin orsamentu hamutuk US$ 22.990.045, depois hetan estimasaun inisiál US$ 16 millaun resin no husu orsamentu adisionál US$ 6 millaun resin.
Orsamentu propostu ba 2027 fahe ba saláriu no vensimentu US$ 14.921.000, bens no servisu US$ 6.551.000, kapital menór US$ 975.000 no kapital dezenvolvimentu US$ 541.650.
Nia esplika katak, aumentu iha kategoria saláriu no vensimentu tanba enkuadramentu ba funsionáriu sira iha rejime karreira espesiál, ne’ebé lori mudansa ba sira-nia saláriu.
(dom)
