DILI, STLTIMORLESTE.com – Relasiona ho infomasaun neebe viral iha media sosial (Medsos) katak, iha sala operasaun laiha hena esterilizasaun no ai–moruk anestesia, tanba nee Hospital Nasionál Guido Valadares (HNGV) klarifika ba públiku katak, ida nee falta komunikasaun entre Jestaun Departementu ho família pasiente.
“Ita atu klarifika deit ba publiku katak, los duni horiseik deputadu sira mos levanta kestaun nee iha Plenaria, tanba atu aproveita tempu nee klarifika ba públiku katak, ida nee akontese duni kestaun tekniku, kestaun tékniku ita nia komunikasaun Jestaun internal iha departamentu nian, narealidade ai-moruk no hena nee iha hotu mais tanba jestaun komunikasaun ho família pasiente nee mak hamosu no dala ruma infomasaun la kompletu hamosu interpretasaun neebe la tuir realidade,” hatete Diretór Servisu Apoiu Diagnóstiku no Terapeutiku iha HNGV, Vidal de Jesus Lopes ba jornalista sira iha nia knaar fatin HNGV, Segunda (09/06/2025).
Nia dehan, horiseik ai-moruk ho hena sira nee iha fatin hotu, maibe problema horiseik nee hahu husi dader too loraik nee iha pasiente 15 mak halo operasaun.
“Husi 15 nee, 13 mak ho katégoria emerjénsia no 2 mak katégoria elektivu, agora tenke hatene uluk lai prosesu operasaun nee hotu-hotu tenke liu husi prosesu naruk, laos fasil ohin ita deside lansung opera ne lae, iha pasiente sira nee mos kategoria neebe mak emerjénsia,” nia esplika.
Nia informa, kazu emerjensia signifika ema la halo intervensaun ida nee bele implika fali pasiente nian vida, maibe kazu elektivu nee pasiente neebe mak planu atu halo operasaun.
“Ita la halo intervensaun bele implika ba nia vida, kazu elektivu nee pasiente sira neebe mak ita planeiadu tiha ona, hanesan ohin planu iha semana oin mak opera, pur ezemplu nee ita planu nia kondisaun ita foti ohin mos la iha problema tanba ita planu ona atu halo intervensaun ba iha nian moras nee rasik,” nia deklara.
Nia hatutan, ho nunee horiseik kebetualan hanesan husi 15 pasiente foin konfirma ho parte OPD husi 15 iha kazu elektivu neebe planeiadu komu emerjénsia nee tama barak liu, liu-liu inan isin rua neebe mak ho Cesariana hamutuk nain 9 kedas horseik husi dader too liraik.
“Kestaun nee dala ruma nivél departamentu presiza iha komunikasaun ho família pasiente atu la bele hamosu dezentendimentu, narealidade horseik kalan ami ba Chek kedas sasan no ai-moruk sira nee, kompletu gan ida uza ba sala operasaun nee mos kompletu reserva iha gundan mos nakonu hela, kestaun komunikasaun ho jestaun nivel departamentu nee mak presiza hadia atu nunee la bele hamosu tan dezentendimentu hanesan nee,” nia deklara.
Iha fatin hanesan, Familia Pasiente Veronica de Jesus informa, pasiente hein halo operasaun, maibe iha sala operasaun labele halo operasaun, tanba hena esterilizasaun no ai-moruk anestesia laiha.
“Ami nia pasiente sei hein, tanba informasaun ami rona katak, hena esterilizasaun no aimoruk anestesia laiha, tanba ita labele taka ba públiku, iha dehan iha, laiha dehan laiha, atu nunee Governu bele rezolve lalais, sei lae pasiente bele mate, tanba hein kleur demais,” nia afirma.
(jen)
