DILI, STLTIMORLESTE.com – Prezidente Republika (PR), Jose Ramos Horta hatete, deputadu sira neebe mak iha Parlamentu Nasional hatudu atitude brutalizmu sei fo impaktu la diak ba sira nia partidu, no la hatudu repeita ba votu povu nian.
Xefe Estadu hatoo kestaun nee ba jornalista sira bainhira remata entrega Premiu Direitus Umanus Sergio Vieira de Mello Edisaun 17 ba vensedor nain lima, iha Palasiu Prezidensial, Nicolau Lobato, Tersa (10/12/2024).
“Impaktu negativu liu-liu ba sira rasik sei impaktu ba sira nia partidu, povu iha Timor iha mundu povu trauma ho violensia ho istoria ba kotuk nee, kuandu sira haree deputadu sira koalia mangame nee impaktu ba partidu, povu hakarak rona lider partidu neebe hatudu matenek, hatene koalia ho klama ho klean buka solusaun iha parlamentu, Governu aprezenta lei ruma, aprezenta orsamentu buka kolabora koalia didiak, hanesan iha 2013, Doutor Mari fo ordem ba bankada para kolabora ho Governu orsamentu liu unaminidade depois momentu neeba sira kolabora diak los nee mak Maun Xanana tau Doutor Mari iha Oekusi,” katak PR, Horta.
Iha biban nee, PR Horta mos koalia ba lider partidaria sira katak fo instrusaun ba membru iha parlamentu nasional koalia ho kalma, respeitu, hatudu debate ho kakutak malirin, se koalia mangame eleisaun foun mai labele ba tuku odamata hodi husu ajuda ba partidu.
“Eleisaun foun mai depois labele mai tuku janela, odamatan, apa bele ajuda ami nia partidu ka lae, depois mak ita haree durante imi tolok hau tinan hira nia laran derrepente imi husu apoiu,” katak nia.
Xefe Estadu hatete, deputadu reprezenta povu iha Parlamentu Nasional, maibe hatudu atitude la diak, buka tuku malu, eleisaun foun mai husu povu lalika vota ba sira.
Eleisaun mai sei hatudu ba eleitoradu kona-ba video sira neebe barak iha Parlamantu Nasional nee, hatudu povu katak hakarak hili nafatin sira.
Tanba nee iha eleisaun mai kuidadu ho sira neebe mak koalia makaas sabraut sira nee, karik PR mak iha influensia ruma karik sei tun hatete ba povu katak hakarak rai nee ba oin labele vota ba sira neeba.
(eme)
