DILI, STLTIMORLESTE.com – Prezidente Republika (PR), Jose Ramos Horta hatete, nia konkorda ho idea husi Eis Prezidente Republika, Francisco Guterres Lú Olo, no Eis Primeiru Ministru, Mari Aklaktiri neebe hatete katak, lider tuan presiza hamutuk iha unidade, nunee haree ba futuru nasaun Timor Leste.
Xefe Estadu hatoo lia hirak nee ba jornalista sira, bainhira remata entrega Premiu Direitu Umanu Sergio Vieira de Mello Edisaun 17 ba vensedor nain lima, iha Palasiu Prezidensial, Nicolau Lobato, Tersa (10/12/2024).
“Hau konkorda, hau konkorda ita tenke tuur koalia para haree ba oin 2027/2028, ba oin eleisaun foun mai nee ita atu tama ASEAN, tama ona 2025, karik depois signifika saida, 2025 tinan rua liu tiha eleisaun Prezidensial depois tinan ida liu tan eleisaun parlamentar tenke haree depois ita tama ASEAN periodu trazisaun ba jerasaun, klaru sira 1975 ami nai rua deit, hau ho maun Xanana mak iha Governu, maibe diak liu doutor Mari Alkatiri jerasaun 1975 no sira neebe mak iha estadu nia laran, maibe iha seluk hanesan Doutor Abilio Aroujo nia la envolve iha partidu politiku, nia mos papel importante tebes iha 1974-1975 ba oin iha liur no seluk tan,” katak PR, Horta.
Prezidente Republika hatete, iha lideransa agora daudaun neebe iha Estadu mak Prezidente Republika, Jose Ramos Horta rasik, no Primeiru Ministru Xanana Gusmão, fora husi ida nee iha Sekretariu Jeral Partidu FRETILIN, Mari Alkatiri.
“Doutor Francisco Guterres Lú Olo laos hola parte iha jerasaun 1975, nia mos laos joven ona, maibe komu nuudar eis Prezidente Republika no Prezidente Partidu FRETILIN ema ida hau respeita istima, hau prontu sempre para ami tuur hamutuk koalia halo balansu ba rai nee nia besik 23 anos ona saida tan mak halo ba oin no oinsa para hadover iha 2027 2028, hau laiha problema,” katak PR Horta.
Xefe Estadu hatete, iha 2012 nia sai tiha ona servisu iha liur tinan 10 ho nasoens unidas ho setor privadu internasional depois fila tanba Xanana mak bolu, tanba nee mak nia laos ema neebe hakoak metin kadeira la husik.
Iha loron Sabadu, Eis Prezidente Republika atual Prezidente Partidu FRETILIN, Francisco Guterres Lú-Olo husu atu lideransa trez jerasaun sira tenke tur hamutuk hodi halo reflesaun atu asume buat hotu-hotu hodi hatan ba povu nia moris.
“Hau hakarak atu hatete lider primeira jerasaun, Segunda no terseira jerasaun diak liu tur hamutuk halo reflesaun hodi asume buat hotu, pozitivu no negativu ita hotu ninian, ita asume fali buat hotu-hotu hodi lao ba oin ba ita nia beioan sira nia di’ak”, deklara Prezidente Partidu FRETILIN, Francisco Guterres Lu-Olo.
Eis Prezidente Republika nee haktuir, buat hotu-hotu liu ona ba kotuk, tanba nee importante ba lider sira tenke kaer metin nafatin prinsipiu da luta atu bele liberta povu ida nee.
Nunee mos Sekretariu Jeral FRETILIN, Marii Amude Alkatiri hatete, durante nee nia halo reflesaun naruk hodi hanoin ba kauza sira luta ba ukun rasik aan neebe mak saudozu sira sakrifika aan ba mate hodi haburas rezistensia luta nian.
Nia dehan, hamutuk liu tinan 24 resin, hotu-hotu hamutuk hakotu jornada ida libertasaun da patria ho povu votu iha referendum no hamutuk manan.
“Agora hau husu ita tama iha jornada foun ho restaurasaun independensia, ita nia kauza nee ita define didiak ona ka lae, no ita konsege kompreende didiak kauza saida mak atu kore povu husi kiak ho mukit,” katak nia.
Nia husu atu lideransa sira hahu husi tinan 1974 too 1999 atu tur hamutuk hodi bele hanoin 2025 no saida mak tenke halo hodi bele define prosesu jornada ba tinan oin no tinan tuir mai.
(eme)
