DILI, STLTIMORLESTE.com – Prezidente Repúblika (PR), José Ramos-Horta sei aproveita viajen ba Repúblika Koreia no Europa atu promove dame no ko’alia kona-ba nesesidade pás iha mundu.
Kestaun ne’e hato’o husi Primeiru-Ministru Kay Rala Xanana Gusmão, ba Jornalista bainhira remata enkontru semanal ho Prezidente Repúblika José Ramos Horta iha Palásiu Prezidensiál Nicolau Lobato Bairo Pite, Kuarta (04/11/2026).
Primeiru-Ministru hatete katak, Prezidente sei ba Repúblika Koreia, Bruxelas no París, atu ko’alia kona-ba situasaun mundiál no importánsia dame.
“Prezidente sei ko’alia kona-ba pás no nesesidade atu iha dame iha mundu, tanba mundu ohin loron hasoru situasaun difísil,” Xanana Gusmão dehan.
Nia esplika katak, konflitu iha Ukránia obriga nasaun barak atu aumenta gastu militár, inklui sosa ekipamentu no armamentu ba funu.
Xanana hatete katak, situasaun ne’e fó impaktu ba ekonomia no moris povu, tanba governu sira gasta osan barak ba funu.
“Funu halo povu sofre, tanba osan ne’ebé tenke uza ba nesesidade povu nian gasta ba armamentu,” Primeiru-Ministru dehan.
Nia mós refere manifestasaun iha nasaun sira iha Europa, ne’ebé relasiona ho kustu moris, uma-kter, edukasaun no saláriu ki’ik.
Xanana hatete, Prezidente sei aproveita oportunidade iha viajen ne’e atu hato’o mensajen kona-ba importánsia dame no nesesidade atu rezolve konflitu liuhusi diálogu.
Aleinde ne’e, Primeiru-Ministru husu ba juventude Timor-Leste atu evita halo manifestasaun ho violénsia no promove diálogu bainhira iha problema ho Governu.
Nia refere mós ba manifestasaun iha Indonézia no husu ba joven sira atu aprende husi situasaun ne’ebé akontese iha nasaun seluk. No husu joven sira iha Timor Leste kria dame.
Iha enkontru ne’e, Xanana informa katak, líder sira husi Mónaku sei vizita Timor-Leste. Nia mós hatete katak, iha loron 28 Novembru, líder sira husi Fiji, Vanuatu no Papua-Nova Giné sei mai selebra hamutuk ho Timor-Leste.
Xanana enfatiza katak, vizita no selebrasaun sira ne’e importante atu hametin amizade, solidariedade no dame entre nasaun sira.
“Objetivu mak atu enkoraja malu no fó hanoin ba malu, atu ita kontinua moris iha dame,” Xanana Gusmão dehan.
Dame no estabilidade internasionál sai hanesan asuntu importante ba komunidade internasionál, liuliu tanba konflitu armadu no krize polítika ne’ebé afeta populasaun iha nasaun oioin.
Konflitu iha Ukránia, ne’ebé hahú ho invazaun Rusia iha Fevereiru 2022, kontinua hamosu impaktu ba seguransa, ekonomia no moris povu iha mundu.
Nasaun sira presiza hametin diálogu, diplomásia no kooperasaun internasionál atu buka solusaun ba konflitu no garante dame duradoura.
(eme)
