DILI, STLTIMORLESTE.com – Orsamentu Jerál Estadu (OJE) 2026 ho montante US$ 2,291 billiaun, maibé povu foho sei susar hakat mota no liu husi estrada aat, ne’ebé difikulta atividade loroloron.
Maske Governu aloka orsamentu boot ba infraestrutura, kondisaun estrada no ponte iha área rurál balu seidauk responde ba nesesidade komunidade, liuliu iha tempu udan.
Estrada ne’ebé aat difikulta agrikultór sira atu lori produtu ba merkadu. Bainhira udan tun, dalan balu sai susar atu liu, ne’ebé afeta atividade ekonomia komunidade nian.
Investimentu infraestrutura ne’ebé Estadu halo tinan-tinan hamosu kestionamentu kona-ba kualidade obra no prioridade dezenvolvimentu, tanba komunidade rurál balu kontinua enfrenta problema estrada ne’ebé hanesan.
Diferensa kondisaun infraestrutura entre kapital no área rurál mós sai preokupasaun, liuliu bainhira estrada no ponte ne’ebé liga zona produsaun agríkola ho merkadu seidauk hetan atensaun adekuada.
Observadór ekonómia, António Martins, kritika katak gastu infraestrutura ne’ebé Estadu halo durante ne’e seidauk fó solusaun duradoura ba komunidade iha munisípiu no área rurál.
“Governu gasta osan billiaun ba billiaun, maibé povu foho sei susar lori produtu agríkola ba merkadu tanba estrada aat no nakfura,” dehan António ba STL, iha Akait, Dili, Kuarta (04/11/2026).
Nia konsidera katak alokasaun orsamentu presiza fó prioridade ba infraestrutura ne’ebé responde diretamente ba nesesidade povu, la’ós de’it aumenta númeru projetu konstrusaun.
“Se osan barak gasta, maibé estrada rurál kontinua aat, ne’e hatudu katak prioridade orsamentu seidauk responde ba problema ne’ebé povu enfrenta,” nia hatutan.
António mós alerta katak projetu ne’ebé la iha kualidade bele hamosu gastu repetitivu, tanba obra ne’ebé foin remata bele estraga fali no presiza hadi’a.
“Se OJE 2026 la fó prioridade ba kualidade estrada rurál, osan ne’ebé gasta sei la lori benefísiu duradouru ba dezenvolvimentu no redusaun pobreza,” nia dehan.
Tanba ne’e, António husu Parlamentu Nasionál no Governu atu avalia ho rigor empreza konstrutora sira, hodi asegura projetu infraestrutura iha kualidade no fó benefísiu ba komunidade.
Iha parte seluk, akademista Universidade da Paz (UNPAZ), Luciano de Araujo, konsidera katak distribuisaun orsamentu tenke reflete nesesidade komunidade, atu evita diferensa dezenvolvimentu entre sidade no área rurál.
“Estrada aat iha área rurál sai obstákulu ba ekonomia lokál. Se investimentu foka de’it ba kapital, povu foho sei kontinua hasoru difikuldade,” dehan Luciano.
Nia subliña katak orsamentu Estadu tenke fó oportunidade hanesan ba komunidade iha área urbana no rurál, liuliu atu fasilita transporte no asesu ba merkadu.
“Se povu foho susar lori produtu ba merkadu, enkuantu projetu boot kontinua iha kapital, OJE ne’e seidauk responde ba dezenvolvimentu inkluzivu,” nia remata.
(car)
