DILI, STLTIMORLESTE.com – Povu iha área rural sai vítima hosi aumentu presu foos iha merkadu, ne’ebé agora to’o $17–$19 ba kada saka ho todan kilogramas 20. Presu ne’e hamenus família ho rendimentu ki’ik sira-nia kapasidade atu sosa hahán prinsipál loroloron.
Aumentu presu foos aumenta despeza família nian, liuliu ba komunidade ne’ebé iha rendimentu limitadu. Família sira tenke fahe osan ne’ebé iha atu responde ba nesesidade hahán no gastu báziku seluk.
Situasaun ne’e hamosu preokupasaun kona-ba asesu populasaun ba hahán báziku. Iha área rural, presu foos ne’ebé aas bele aumenta difikuldade família sira atu garante nesesidade alimentár loroloron.
Kontrolu presu no distribuisaun produtu báziku sai dezafiu ba autoridade kompetente, tanba merkadu envolve fa’an-na’in no empreza oioin. Intervensaun Governu presiza konsidera kondisaun ekonomia komunidade no kapasidade sosa hosi família ho rendimentu ki’ik.
Observador ekonomia, Mariano da Silva, husu Governu atu foti medida urjente hodi kontrola presu foos iha munisípiu no aldeia sira.
Nia hateten katak, komunidade iha baze enfrenta difikuldade tanba kustu moris aumenta.
“Governu labele husik de’it merkadu lao livre iha área rural kuandu presu produtu baziku hanesan foos sa’e to’o todan povu nia kbiit. Intervensaun Estadu nian mak tenke iha atu proteje poder de compra povu ki’ik,” Mariano da Silva subliña ba STL, iha Kolo, Díli, Kuarta (04/11/2026).
Tuir Mariano , autoridade kompetente presiza aplika mekanizmu regulasaun merkadu atu proteje poder de compra populasaun no asegura estabilidade seguransa alimentár iha baze.
Iha parte ketak Akademista Universidade Nasionál Timor Lorosa’e (UNTL), Marcos Soares, mós defende planu estratéjiku atu garante distribuisaun produtu báziku to’o área rural ho presu justu no adekuadu ba kapasidade finanseira populasaun.
“Ita presiza haree asuntu ne’e ho atensaun kle’an tanba ne’e kona-ba moris di’ak povu nian iha baze,” Marcos Soares dehan.
Antes nee Primeiru-Ministru Kay Rala Xanana Gusmão rekoñese katak kontrola presu foos iha merkadu rai-laran la’ós tarefa fasil, tanba individu no empreza barak mak fa’an produtu ne’e.
Xefe Governu hateten katak saka foos ida ho todan kilogramas 20 agora fa’an ho presu US$17 to’o US$19, ne’ebé sai todan ba populasaun ho rendimentu ki’ik.
“Susar tebes atu kontrola. Tanba bainhira hatuun, ha’u bá to’o interior ne’e, iha fatin, iha luron-luron, sor-sorin sira ne’e iha hotu. Ha’u dehan, ne’e ita atu kontrola halo nusá,” Primeiru-Ministru, Xanana Gusmão hateten.
(car)
