DILI, STLTIMORLESTE.com – Prezidente Republika (PR), Jose Ramos Horta hatete, too oras nee servisu Komisaun Anti Korrupsaun (KAK) seidauk masimu, tanba durante nee KAK politiza liu ba partidu, espera ho Komisariu KAK foun, Rui dos Santos Pereira bele servisu ho integridade.
Xefe Estadu hatoo kestaun nee ba jornalista sira, bainhira remata entrega Premiu Direitu Umanu Sergio Vieira de Mello Edisaun 17 ba vensedor nain lima, iha Palasiu Prezidensial, Nicolau Lobato, Tersa (10/12/2024).
“Seidauk, seidauk, primeiru tanba Komisariu KAK foin mak ba hahu, maibe iha tinan lubuk ida nia laran ita haree KAK hanesan mos PJR nia servisu politiza demais tau matan liu-liu ba partidu sira neebe sira la gosta ou lider sira neebe sira la gosta CNRT ka PD, hau espera katak ho Komisariu KAK foun bele kurizi no ratifika halo servisu ida neebe integridade, labele halo akuzasaun tun sae, tanba dala barak ema hetan akuzasaun korrupsaun ministru ruma ka Visi Ministru ka Sekretariu Estadu, maibe kazu nee laos tanba korrupsaun, kazu nee bele hatete mal jestaun, ezemplu se kontratu ida lao sala asina sala nee laos ona korrupsaun, nee bele hatete neglijensia,” katak PR, Horta.
Prezidente Republika hatete, se halo demaziadu politizasaun ho buat hotu-hotu korrupsaun entau ema komesa tauk asina, tanba nee mak prosesu barak demora ministru tauk asina asesor sira hein demora entaun kria klima ida demedu.
Tanba servisu KAK nee importante hanesan PJR nia, maibe mos labele hanesan PSIK inklui mos PNTL halo intervensaun oin-oin hanesan anarkia laos agora maibe uluk, ezemplu kazu halo asaltu ba grupu joven nain 5 ka 6 fuma mariona nee.
Maibe sistema judisaria nee indepedente maibe KAK politiza fali nee publiku hotu hatene no haree, maibe agora la hatene ho Prezidente KAK foun tenke fo tempu ba nia no oportunidade ba nia se nia bele halo reforma kurizi buat neebe iha laran.
(eme)
